कोरोना राहतबाट ११ लाख लिएर गहना र व्यक्तिगत खर्च गर्ने न्युयोर्कको क्वीन्स निवासी व्यक्ति पक्राउ
प्रकाशित मिति : फाल्गुन ११, २०८० शुक्रबार
न्युयोर्कको क्वीन्स निवासी एक व्यक्ति सरकारको कोरोना राहतबाट जालसाजीपूर्ण तरिकाले ११ लाख डलर लिएर गहना किन्न र अन्य व्यक्तिगत खर्चमा रकम प्रयोग गरेपछि पक्राउ गरिएको अधिकारीहरुले बताएका छन् । ३६ वर्षीय टेरी डोरलाई ठगी र मनी लान्ड्रिङ अभियोगमा बिहीबार संघीय अदालतमा उपस्थित गराइएको थियो ।
आईआरएसका अनुसन्धानकर्ताहरुले यसबारे फेला पारेपछि अभियोग सामने आएको हो । उनले महामारी सम्बन्धित ऋणका लागि टेरी डोर प्रोफेशनल कन्सल्टेन्ट्स नामको नक्कली कम्पनी खडा गरेका थिए, जसको कुनै आम्दानी वा खर्च थिएन ।
उनले महामारीबाट प्रभावित व्यवसायहरूलाई महामारीको आर्थिक नतिजाबाट बच्न मद्दत गर्ने सरकारी कोषबाट ११ लाख डलर निकाल्न बनावटी जानकारीले भरिएको आवेदन पेश गरेको युएस एटोर्नीले जनाएका छन् । त्यसपछि उनले रकमलाई गहना किन्न र व्यक्तिगत धितोपत्र कारोबारको लागि प्रयोग गरेका थिए ।
अभियोगमा डोरले न्यूयोर्क शहरको एक प्रिमियम गहना विक्रेतामा १ लाख २५ हजार डलर खर्च गरेको उल्लेख छ। क्वीन्सको जमैकामा बसोबास गर्ने डोरलाई बिहीबार गिरफ्तार गरिएको थियो भने ५० हजार डलर धरौटीमा रिहा गरिएको अधिकारीहरूले बताएका छन् ।