झण्डै डेढलाख जनाको १.२ बिलियन डलर ऋण मिनाहा गर्दै बाइडेन प्रशासन
प्रकाशित मिति : फाल्गुन ९, २०८० बुधबार
बाइडेन प्रशासनले १ लाख ५३ हजार जनाको १ दशमलव २ बिलियन डलर विद्यार्थी ऋण स्वतः मिनाहा गर्दै गरेको बुधबार घोषणा गरेको छ । ऋण मिनाहा पाउनेहरुले आज राष्ट्रपति जो बाइडेनबाट माफीको बारेमा जानकारी दिने इमेल प्राप्त गर्ने डिपार्टमेन्ट अफ एजुकेशनले जनाएको छ ।
गत वर्ष सर्वोच्च अदालतले बाइडेन प्रशासनको व्यापक विद्यार्थी ऋण मिनाहाको योजनालाई अमान्य गरेपछि विद्यार्थी ऋणलाई सम्बोधन गर्न ह्वाइट हाउसको यो नयाँ कदम हो । सर्वोच्च अदालतले कार्यान्वयनमा रोक लगाएको योजनामा ४० मिलियन व्यक्तिलाई हरेकको २० हजार डलरसम्मको ऋण मिनाहा समेटिएको थियो ।
बाइडेन प्रशासनले अहिलेसम्म लगभग ३ दशमलव ९ मिलियन व्यक्तिलाई ऋण राहत स्वीकृत गरिसकेको छ । पछिल्लो योजनामा समेटिएका १ लाख ५३ हजार जना व्यक्ति सेभ कार्यक्रममा समेटिएका र १० बर्षसम्मको भुक्तानी गरिसकेका व्यक्तिहरू हुन्। यो कार्यक्रममा योग्य हुनेहरु कलेजका लागि १२ हजार डलर वा सोभन्दा कम ऋण लिएकाहरु हुन् ।
१२ हजारडलर भन्दा माथि ऋण लिएकाहरुले हरेक १ हजार डलरका लागि भुक्तानीको अतिरिक्त बर्षपछि मिनाहा प्राप्त गर्न सुरु गर्नेछन् । अर्थात् १३ हजार ऋण लिएकाले ११ बर्ष भुक्तान गरिसकेपछि र १४ हजार ऋण लिएकाले १२ बर्ष भुक्तान गरिसकेपछि बाँकी ऋणमा मिनाहा प्राप्त गर्नेछन् । ऋण मिनाहा पाउनका लागि उधारकर्ताले कुनै कदम चाल्न नपर्ने डिपार्टमेन्ट अफ एजुकेशनले जनाएको छ ।
सेभ कार्यक्रममा समावेश भएका हरेकले २० देखि २५ बर्षसम्म ऋण तिरेपछि बाँकी ऋण मिनाहा पाउने प्रावधान पहिलेदेखि नै रहेको छ । बाइडेन प्रशासनले यही प्रावधानलाई १० बर्षमा झारेको हो । अहिलेसम्म साढे ७ लाख व्यक्तिहरु सेभ कार्यक्रममा समावेश छन् । सेभ कार्यक्रममा समावेश हुनका लागि उधारकर्ताले यहाँ क्लीक गर्नुहोला ।