न्युयोर्कका नेपाली उबर चालकले पाए साढे १४ लाख डलर क्षतिपूर्ति
प्रकाशित मिति : फाल्गुन ८, २०८० मंगलबार
न्युयोर्कका नेपाली उबर चालकले सन् २०१५ मा भएको एउटा दुर्घटनामा साढे १४ लाख डलर क्षतिपूर्ति पाएका छन् । झण्डै साढे ८ बर्षसम्मको कानूनी लडाईपछि उनले क्षतिपूर्ति पाउन सफल भएका हुन् ।
सन् २०१५ मा न्युयोर्कको जोन अफ केनेडी विमानस्थलमा एकजना यात्रु छाडेर फर्कने क्रममा उनको गाडीलाई विमानस्थल नजिकै एयरलाइन्सको शटल बसले ठक्कर दिएको थियो । दुर्घटनामा उनी घाइते भएका थिए ।
घाइते भएका कारण काममा जान नसक्ने अवस्था आएपछि उनले ब्लाक कार फण्डबाट अपंगता भत्ता समेत प्राप्त गरेका थिए भने ठक्कर दिने बस कम्पनीविरुद्ध मुद्दा दायर गरिएको थियो । बस कम्पनीले पनि आफ्नो गल्ती नभएको दावी गर्दै मोसन फाइल गरेको थियो । तर न्यायाधिसले उबर चालकका तर्फबाट फाइल गरेको मोसन अगाडि बढाउन स्वीकृति दिए भने बस कम्पनीका तर्फबाट फाइल गरिएको मोसन अस्वीकृत गरिदिए ।
जुरी छनौट प्रकृयामा रहेको बेलामा बस कम्पनीले १४ लाख डलर ५० हजार डलर क्षतिपूर्ति दिन तयार भएपछि मुद्दा समाप्त भएको छ । क्वीन्स सुप्रिम कोर्टमा फाइल गरेको उक्त मुद्दामा उबर चालकका तर्फबाट नेपाली मूलका कानुन व्यवसायी दुर्गा भूर्तेलले प्रतिनिधित्व गरेका थिए । चालकलाई क्षतिपूर्ति दिलाउन सफल भएकोमा खुशी व्यक्त गर्दै कानुन व्यवसायी भूर्तेलले यसबाट पीडितलाई केही राहत मिलेको बताए ।
कानुन व्यवसायी भुर्तेलले व्यक्तिगत चोटपटकका मुद्दाको प्रतिनिधित्व गर्दै आएका छन् भने कैयन मुद्दामा उल्लेख्य सफलता हासिल गर्दै आएका छन् । लेड मुद्दामा उनले पीडितलाई २८ लाख ७० हजार क्षतिपूर्ति दिलाउन सफल भएका थिए भने निर्माणकार्यका क्रममा घाइते एकजना नेपालीलाई २८ लाख डलर क्षतिपूर्ति दिलाएका थिए । ब्रुकलिनमा एकजना व्यक्तिलाई फेडेक्सको ट्रकले हानेको मुद्दामा उनी ४ लाख ५० हजार डलर क्षतिपूर्ति दिलाउन सफल भएका थिए ।
त्यस्तै क्वीन्समा भवन अगाडि साइडवाकमा हिड्ने क्रममा साइडवाक भत्केका कारण घाइते भएका नेपालीलाई ४ लाख डलर क्षतिपूर्ति दिलाउन सफल भएका थिए । त्यस्तै गतबर्ष लण्ड्रीमा काम गर्ने एक नेपाली कपडा पिकअप गरेर फर्कने क्रममा अपार्टमेन्टको ढोकाले थिचेर घाइते भएपछिको मुद्दामा १२ लाख ७५ हजार क्षतिपूर्ति दिलाउन सफल भएका थिए ।