छिटो निर्णयका लागि ग्रिनकार्ड आवेदनसँगै मेडिकल रिपोर्ट पनि पेश गर्न युएससीआईएसको सुझाव
प्रकाशित मिति : फाल्गुन ६, २०८० आईतबार
स्थिति समायोजनको लागि ग्रिनकार्ड आवेदन आई ४८५ फाइल गर्नेहरुलाई उक्त आवेदनका साथमा मेडिकल तथा खोप रिपोर्ट समेत पेश गर्न युएससीआईएसले सुझाव दिएको छ । आई ४८५ आवेदनका साथमा नै मेडिकल रिपोर्ट पठाउँदा युएससीआईएसले थप कागजातको अनुरोध गर्नुपर्ने आवश्यकता कम हुने युएससीआईएसले जनाएको छ । ग्रिनकार्ड आवेदनका साथमा मेडिकल रिपोर्ट पेश गर्दा आवेदनबारे छिटो निर्णय हुनसक्ने भएकाले आवेदकहरुलाई यस्तो सुझाव दिइएको हो ।
युएससीआईएसले सामान्यतया सिभिल सर्जनले हस्ताक्षर गरेको मितिले २ वर्षसम्म मेडिकल रिपोर्टलाई मान्यता दिन्छ । मार्च ३१, २०२३ देखि मेडिकल रिपोर्टको म्यादबारेको नीतिमा युएससीआईएसले पुनरावलोकन गरेको हो । जस अनुशार सिभिल सर्जनले हस्ताक्षर गरेको मितिले मेडिकल रिपोर्टले २ बर्षसम्म काम गर्छ । तर उक्त २ बर्ष म्याद सकिदासम्मपनि ग्रिनकार्ड आवेदनबारे निर्णय हुन नसकेको खण्डमा भने नयाँ रिपोर्ट पेश गर्नुपर्छ ।
त्यस्तै मेडिकल रिपोर्टमा सिभिल सर्जनले हस्ताक्षर गरेको ६० दिनभित्र युएससीआईएसमा पेश गर्नुपर्ने प्रावधानलाई समेत युएससीआईएसले हटाइसकेको छ । सन् २०२१ को डिसेम्बर अगाडि भने अध्यागमन सुविधाका लागि आवेदन दिंदा सिभिल सर्जनले मेडिकल रिपोर्टमा हस्ताक्षर गरेको ६० दिन नाघिसकेको भएमा त्यस्तो रिपोर्टलाई मान्यता दिइदैनथ्यो । डिसेम्बर ९, २०२१ देखि उक्त नियममा अस्थायी छुट प्रदान गरिएकोमा मार्च ३१, २०२३ बाट उक्त नियममा स्थायी छुट नै प्रदान गरिएको छ ।
ग्रिनकार्ड आवेदन आई ४८५ फाइल गर्दाकै समयमा मेडिकल रिपोर्ट पेश गर्नु अनिवार्य छैन । केही आवेदकहरूले मेडिकल रिपोर्ट आफ्नो अन्तर्वार्तामा पनि ल्याउन सक्छन् । तर केही आवेदनहरूलाई अन्तर्वार्ता आवश्यक नहुने भएकाले अन्तर्वार्ता आवश्यक नहुनेहरुको सन्दर्भमा ग्रिनकार्ड आवेदनका साथमा नै मेडिकल रिपोर्ट पठाउँदा प्रकृया सहज र छिटो हुनेगर्छ । अन्तरवार्ता आवश्यक पर्ने नपर्ने निर्णय युएससीआईएसले आवेदन अनुशार गर्छ ।