रोजगारमा आधारित पहिलो श्रेणीको ग्रिनकार्ड मार्चमा पनि करेन्ट, अन्य श्रेणीमा भने थप निराशा
प्रकाशित मिति : फाल्गुन ६, २०८० आईतबार
रोजगारमा आधारित पहिलो श्रेणीको ग्रिनकार्ड मार्चमा पनि करेन्ट हुने भएको छ । सेप्टेम्बरसम्म रोजगारमा आधारित कुनै पनि श्रेणीको ग्रिनकार्ड करेन्ट नभएकोमा त्यसपछि रोजगारमा आधारित पहिलो श्रेणीको ग्रिनकार्ड करेन्ट हुँदै आएको छ । अर्थात् मार्चमा पनि पहिलो श्रेणीको आवेदन आई १४० का साथमा ग्रिनकार्ड आवेदन आई ४८५ फाइल गर्न पाइने भएको छ ।
तर मार्चका लागि युएससीआईएसले भिसा बुलेटिनको फाइनल एक्सन डेटलाई आधार मान्दा अमेरिकाभित्रै हुनेहरुका सन्दर्भमा रोजगारमा आधारित अन्य श्रेणीको ग्रिनकार्ड कुरिरहेकाहरुलाई भने थप निराश बनाएको छ । यस अगाडि युएससीआईएसले भिसा बुलेटिनको फाइलिङ डेटलाई आधारमान्दै आएको थियो ।
रोजगारमा आधारित दोश्रो र तेश्रो श्रेणीको ग्रिनकार्डका लागि फेब्रुअरीमा आई ४८५ ग्रिनकार्ड आवेदन फाइल गर्न पाइने प्राथमिकता मिति क्रमशः १५ फेब्रुअरी २०२३ र १ फेब्रुअरी २०२३ रहेकोमा अब मार्चमा २२ नोभेम्बर २०२२ र ८ सेप्टेम्बर २०२२ भएर अझ पछाडि सरेको छ । अर्थात् ग्रिनकार्ड आवेदन फाइल गर्नका लागि प्रतिक्षा अवधि अझ बढेको छ ।
रोजगारमा आधारित तेश्रो श्रेणीको अनस्कील्ड अन्य कामदारका सन्दर्भमा पनि ग्रिनकार्ड आवेदन फाइल गर्नका लागि प्रतिक्षा अवधि मार्चमा बढेको छ । फेब्रुअरीमा १५ डिसेम्बर २०२० भन्दा अगाडि प्राथमिकता मिति भएकाहरुले ग्रिनकार्ड फाइल गर्न सक्ने भएतापनि मार्चका लागि ८ सेप्टेम्बर २०२० भन्दा अगाडिमात्र प्राथमिकता मिति भएकाहरुले ग्रिनकार्ड आवेदन आई ४८५ फाइल गर्न पाउनेछन् । चौथो श्रेणी र अन्य धार्मिक कामदारका सन्दर्भमा भने प्रतिक्षा अवधि ३ महिना घटेको छ ।
आई १४० विचाराधिन रहेको अवस्थामा आवेदकले आई ४८५ फाइल गरिसकेपछि आवेदन विचाराधिन रहँदासम्म वर्क परमिट प्राप्त गर्न, सोसल सेक्युरिटी नम्बर प्राप्त गर्न र एड्भान्स परोलमा अमेरिकाबाहिर यात्रा गर्न समेत सकिन्छ । तर यसबारे निर्णय गर्नु अगाडि आफ्नो केसको प्रकृतिबारे लाइसेन्सप्राप्त कानुन व्यवसायीसँग सल्लाह लिनुपर्छ ।