नेपाली नर्स इनु योल्मो न्युयोर्कमा क्यान्सरले सिकिस्त, म्यानहटनको अस्पतालमा भेन्टिलेटरमा
प्रकाशित मिति : फाल्गुन ३, २०८० बिहीबार
झण्डै ६ महिना अगाडि अमेरिका आएकी २७ बर्षीया नेपाल नर्स इनु योल्मो न्युयोर्कमा क्यान्सरले सिकिस्त भएकी छिन् । उनलाई अहिले न्युयोर्क म्यानहटनको माउन्ट साइनाई अस्पतालमा भेन्टिलेटरमा राखिएको छ । नेपालको इलामकी योल्मो गत फागुनदेखि बिरामी भएकोमा अहिले उनको अवस्था निकै नाजुक बनेको उनकी साथी मनिषा बुढाले खसोखासलाई जानकारी दिइन् । उनी जुलाईको दोश्रो साता अमेरिका आएकी थिइन् ।
रोजगारमा आधारित तेश्रो श्रेणीको ग्रिनकार्डमा अमेरिका आइसकेपछि उनी अमेरिकाको न्युयोर्कमा नर्सको रुपमा कार्यरत रहदै आएकी थिइन् । गत नोभेम्बरमा अत्यन्तै पेट दुखेपछि उनी अस्पतालमा चेकजाँचका लागि पुगेकी थिइन् । त्यसपछि उनलाई आन्द्राको क्यान्सर भएको पत्ता लागेको थियो । क्यान्सर शरीरको अन्य भागमा पनि फैलिसकेकाले उनको अवस्था सिकिस्त भइसकेको जनाइएको छ ।
अविवाहित योल्मोको अमेरिकामा कुनै पनि आफन्तहरु नभएकाले नेपालबाट बुबाआमा र भाईलाई बोलाउन खोजिएको थियो । तर प्रकृया नपुगेको भन्दै काठमाडौंमा रहेको अमेरिकी दूतावासले भिसा दिन अस्वीकार गरेपछि परिवारका सदस्यहरु पनि अमेरिका आउन पाएका छैनन् । थप कागजातसहित परिवारका सदस्यका लागि फेरि भिसा आवेदन दिने तयारी भइरहेको छ ।
न्युयोर्कका नेपाली समुदायका विभिन्न संघ संस्थाका प्रतिनिधिहरुले आफूलाई सम्पर्क गरेर बिरामीको स्थीतिबारे जानकारी लिएको र केही प्रतिनिधिहरु अस्पतालमा पनि आउने गरेको साथी मनिषा बुढाले जानकारी दिइन् । उनले बिरामीको अवस्था चिन्ताजनक भएकाले सहयोगका लागि अमेरिकामा रहेका नेपाली समुदाय र संघ संस्थाहरुलाई आव्हान समेत गरेकी छिन् ।