अमेरिका निवासी ग्रान्ड मास्टर महर्जन अब तेक्वान्दोको विशिष्ट श्रेणीका रेफ्रीमा पदोन्नति
प्रकाशित मिति : माघ ६, २०८० शनिबार
अमेरिका निवासी तेक्वान्दोका ग्रान्ड मास्टर दिवाकर ‘डान’ महर्जन अब तेक्वान्दोको प्रथम श्रेणीबाट विशिष्ट श्रेणीको रेफ्री भएका छन् । विश्व तेक्वान्दो मुख्यालयले उनलाई अन्तर्राष्ट्रिय रेफ्रीको प्रथम श्रेणीबाट विशिष्ट श्रेणी ‘एस’ वर्गमा पदोन्नति गरेको हो । तेक्वान्दोको हेडक्वाटर दक्षिण कोरियाद्वारा अन्तर्राष्ट्रिय रेफ्रीलाई प्रदान गरिएको यो सबै भन्दा विशिष्ट श्रेणी हो।
झन्डै तीन दशक देखि अमेरिकाको ओरेगन राज्यमा पोर्टल्याण्ड ‘युएस वल्डक्लास तेक्वान्दो हलिउड स्कुल सञ्चालन गर्दै आएका महर्जन अमेरिकामा तेक्वान्दो स्कुल स्थापना गर्ने पहिलो नेपाली समेत हुन्। तेक्वान्दोमा डब्लुटीको मान्यता प्राप्त अन्तर्राष्ट्रिय रेफ्री विशिष्ट श्रेणीमा पदोन्नति हुन कम्तीमा दश वर्ष निरन्तर यो क्षेत्रमा काम गरेको हुनु पर्छ। त्यसै गरी कम्तीमा पनि १५ पटक रिफ्रेसर कोर्स पुरा गर्नु पर्ने हुन्छ।
सन् १९९५ देखि अमेरिकामा तेक्वान्दो प्रशिक्षक रहँदै आएका महर्जन सन् १९९९ एडमन्टन क्यानडामा पहिलो पटक अन्तर्राष्ट्रिय रेफ्री बनेका थिए । नेपालमा भने उनले सन् १९८८ देखि राष्ट्रिय रेफ्रीको भूमिका निभाएका हुन्। सन् २०२३ मा महर्जनले तेक्वान्दोमा दोहोरो आठौँ डान प्राप्त गरेका थिए। उनी दोहोरो आठौँ डान पाउने पहिलो नेपाली हुन्। उनले कोरियाको तेक्वान्दो मुख्यालय कुक्किवानबाट ८औँ डान तेक्वान्दो ब्ल्याक बेल्ट, कोरियाली मार्सल आर्ट्स फेडेरेसन कोरियाबाट हाप्कि डोमा ८ औँ डान ब्ल्याक बेल्ट र लाइफ टाइम अचिभमेन्ट प्राप्त गरेका थिए। उनले सन् २०१५ मा प्यानम ओपन च्यापियनसिपमा बेष्ट रेफ्रि अवार्ड समेत पाएका थिए।
महर्जन अन्तर्राष्ट्रिय खुला मैत्री तेक्वान्दो च्याम्पियनसिपका संस्थापक तथा बोर्ड निर्देशक हुन्। सन् २००० देखि काठमाडौँबाट सुरु भएको आईओएफटीसीको हेडक्वाटर अमेरिकाको पोर्टल्याण्डमा छ। विश्वका विभिन्न देशमा आयोजना भएको च्याम्पियनसिपको १४ संस्करण कोरियाको सियोलमा हुने तय भएको छ। १४औँ अन्तर्राष्ट्रिय खुला फ्रेन्डसिप तेक्वान्दो च्याम्पियनसिप अगस्ट २३ र २४ मा हुनेछ।