नेपालबाट चोरिएका ४ कलाकृति अमेरिकी सरकार र नेपाली महावणिज्यदूतावास न्युयोर्कको पहलमा फिर्ता
प्रकाशित मिति : १८ मंसिर २०८०, सोमबार
नेपालबाट चोरिएर अमेरिका ल्याइएका र हालै फिर्ता गरिएका पुरातात्विक सामग्रीहरु
नेपालबाट विभिन्न समयमा चोरिएर अमेरिका ल्याइएका चारवटा नेपाली मूर्तिहरु आज आयोजित एक समारोहमा न्युयोर्कको म्याहटन डिस्ट्रिक्ट एटोर्नीको कार्यालयले न्यूयोर्कस्थित नेपाली महावाणिज्य दूतावासलाई हस्तान्तरण गरेको छ । १६औं र १७औँ शताब्दीका नेपालका कलाकृतिहरूमा दुईवटा सुनौलो भैरव मुखुन्दो, एउटा उमा महेश्वरको ढुङ्गामा कुदिएको मूर्ति र र दुर्गाको मूर्ति समावेश छ ।
यी कलाकृतिहरूले नेपालको विगतको समृद्ध सांस्कृतिक सम्पदा र मूल्यमान्यताका विभिन्न पक्षहरूलाई प्रतिनिधित्व गर्छन्। यसअघि महावाणिज्य दूतावासले म्यानहटन डिस्ट्रिक्ट एटोर्नी अफिसलाई यी पुरातात्विक वस्तुहरू फिर्ता गर्न सहयोगको लागि अनुरोध गरेको थियो।
कार्यवाहक महावाणिज्यदूत विष्णु गौतमले यी मूर्तिहरू म्याहटन डिस्ट्रिक्ट एटोर्नी एल्भिन ब्राग, जुनियर, डिस्ट्रिक्ट एटोर्नी अफिस र डिपार्टमेन्ट अफ होमल्याण्ड सेक्युरिटीको होमल्याण्ड सेक्युरिटी इन्भेस्टिगेशन्सका अधिकारीहरूबाट प्राप्त गरेका हुन् । कार्यवाहक महावाणिज्यदूत गौतमले म्याहटन डिस्ट्रिक्ट एटोर्नी एल्भिन ब्राग, जुनियर, डिस्ट्रिक्ट एटोर्नी अफिस र डिपार्टमेन्ट अफ होमल्याण्ड सेक्युरिटीको होमल्याण्ड सेक्युरिटी इन्भेस्टिगेशन्सका अधिकारीहरूलाई नेपाल सरकार र जनताको तर्फबाट कृतज्ञता व्यक्त गरेका छन् ।
यी मूर्तिकलाहरूको रिकभरी र प्रत्यावर्तनमा अविश्वसनीय र विचारशील सहयोगका लागि उनले संग्रहालय, अन्वेषक, सञ्चारमाध्यम, कला र सम्पदा अभियानकर्ता र अनुसन्धानकर्ता र यस प्रक्रियामा संलग्न अन्य सबैप्रति गहिरो कृतज्ञता व्यक्त गरे। डिस्ट्रिक्ट एटोर्नी एल्भिन ब्रागले पुरातन वस्तुहरूको तस्करी नेटवर्कहरू जतिसुकै जटिल भए पनि कारवाही गर्न जारी राख्ने बताए । उनले आफ्नो कार्यालय र होमल्याण्ड सेक्युरिटी इन्भेस्टिगेशन्सले नेपालबाट चोरी भएका र हराएको अन्य कलाकृतिहरू फिर्ता ल्याउन पूर्ण सहयोग जारी राख्ने आश्वासन दिए ।
आर्थिक लाभका लागि सांस्कृतिक सम्पदा लुट्न खोज्ने तस्करहरूबाट जोखिम जहिले पनि हुने भन्दै सम्पदाको पुनर्स्थापनामा योगदान गर्न पाउँदा खुशी लागेको होमल्याण्ड सेक्युरिटी इन्भेस्टिगेशन्स न्यूयोर्कका विशेष एजेन्ट इन चार्ज इभान जे अर्भेलोले बताए । म्याहटन डिस्ट्रिक्ट एटोर्नी अफिसका चीफ अफ स्टाफ जोर्डन स्टकडेल र होमल्याण्ड सेक्युरिटी इन्भेस्टिगेशन्स न्यूयोर्कका डिपार्टमेन्ट अफ इन्चार्जमा डेपुटी स्पेशल एजेन्ट क्रिस्टोफर लाउलगायतका वरिष्ठ अधिकारीहरूले नेपाली कलाकृति फिर्ता गराउन सकेकोमा खुशी व्यक्त गरे ।
नेपाली महावाणिज्य दूतावासले दुवै देशका सम्बन्धित सरकारी निकाय र संस्थासँगको सहकार्यमा नेपालबाट चोरी भएका र हराएका पुरातात्वीक वस्तुको पुनःप्राप्ति र नेपालका पुरातात्विक सम्पदामा उनीहरूको उचित स्थानमा पुनः स्थापित गर्न सक्रिय रूपमा सक्रियता देखाएको छ । यी बाहेक महावाणिज्यदूतावास न्युयोर्कले हालसम्म १० औं शताब्दीदेखि १७औँ शताब्दीका अन्य १६ वटा पुरातात्विक वस्तुहरू नेपाल फर्काउन सफलता प्राप्त गरेको छ।