न्युजर्सीमा गाडीको ठक्करबाट छत्र बहादुर नेवारको मृत्युबारे कानुनी प्रकृयाका लागि पहल
प्रकाशित मिति : मंसिर ४, २०८० सोमबार
न्युजर्सीमा गाडीको ठक्करबाट ५४ बर्षीय नेपाली छत्र बहादुर नेवारको मृत्यु भएको विषयमा कानुनी प्रकृयाका लागि पहल सुरु गरिएको छ । रामेछापको दोरम्बा स्थायी घर भएका नेवारको गत बुधबार गाडीको ठक्करबाट न्युजर्सीको समरडेलमा मृत्यु भएको थियो । विहान सबा ६ बजेतिर उक्त घटना भएको जनाइएको छ ।
घटनापछि गाडी र चालकलाई प्रहरीले नियन्त्रणमा लिएको थियो । मृतकको शव क्यामरन काउन्टी मेडिकल एक्जामाइनरको कार्यालयमा राखिएको छ । समरडेल प्रहरीले घटनाबारे अनुसन्धान गरिरहेको छ । एनआरएन अमेरिकका सचिव दीपक सापकोटाले घटनाको थप पुष्टी गरेका छन् ।
छत्रको अन्तिम संस्कारमा सहभागी गराउनका लागि नेपालमा रहेकी पत्नी देवी श्रेष्ठलाई अमेरिका ल्याउन भिसा प्रकृया समेत सुरु गरिएको छ । अन्तिम संस्कारका लागि अमेरिकामा रहेका नेपालीहरुमाझ आर्थिक सहयोग संकलन गर्ने तयारी समेत गरिएको छ ।
मृतक छत्र बहादुर नेवारले अत्याधिक रक्सी पिउने गरेको र महिनामा एक हप्तामात्र काम गर्ने गरेको जनाइएको छ । मृतकको शव नेपाल लैजाने वा अमेरिकामा नै अन्तिम संस्कार गर्ने भन्नेबारे पारिवारिक सल्लाह भइररहेको मृतकका बहिनी ज्वाई पदम श्रेष्ठले जानकारी दिएका छन् । आवश्यक प्रकृयाहरुका लागि मेरिल्याण्डको राज्य संसदमा प्रतिनिधित्व गर्ने सांसद ह्यारी भण्डारीको कार्यालयले पनि सहयोग गरिरहेको छ ।
घटना हुनुभन्दा केही घण्टा अगाडि मृतक छत्र बहादुर नेवारले घरमा पत्नीलाई फोन गरेर आफ्नो ज्यान खतरामा रहेको बताएको पारिवारिक श्रोतको दावी छ । तर घटनाको प्रकृति हेर्दा उनले आरोप लगाएको जस्तो नदेखिएकाले प्रहरीले यसबारे थप अनुसन्धान गरिरहेको जनाइएको छ ।