अमेरिकाको ओहायोमा साथीको छुरा प्रहारबाट मारिएका बुद्धी माझीको शनिबार अन्त्येष्टी गरिने
प्रकाशित मिति : आश्विन १२, २०८० शुक्रबार
अमेरिकाको ओहायोमा आफ्नै साथीको छुरा प्रहारबाट मारिएका बुद्धी माझीको शनिबार अन्त्येष्टी गरिने भएको छ । १३४० उडल्याण्ड एभिन्युमा रहेको ईस्टलन बरियल पार्कमा शनिबार दिउसो १ बजे अन्त्येष्टी गरिने तय भएको छ । न्यु क्रियशन नेपाली चर्च र माझी परिवारले अन्त्येष्टी र बेलुका साढे ५ बजे रेनाल्स्बर्गमा हुने श्रद्धाञ्जली कार्यक्रममा सहभागी हुनका लागि अनुरोध गरेको छ । श्रद्धाञ्जली कार्यक्रम ७१७५ मर्लान सर्कलमा हुनेछ ।
भुटानको माझी गाउँमा सन् १९८७ मा जन्मिएका धनमाया माझी र सुक माझीका छोरा बुद्धी माझीका एक छोरा समेत छन् । उनका दुई दाजुभाई र दुई दिदीबहिनी गरी ४ जना दाजुभाई दिदीबहिनीहरु छन् । माझी परिवार नेपालको बेलडाँगीमा झण्डै २० बर्ष बसेपछि सन् २०१२ मा शरणार्थी पुनर्वास कार्यक्रम अन्तरगत अमेरिका आएको थियो । केहीबर्ष जर्जियाको एटलान्टामा बसेपछि उनीहरु कोलम्बस बसाई सरेका थिए ।
सोमबार विहान ओहायोको रेनोल्ड्सबर्गमा आफ्नै साथी सूर्य भुजेलले बुद्धी माझीको हत्या गरेको प्रहरी अभियोग छ । प्रहरीको रेनोल्ड्सबर्ग डिभिजनका अधिकारीहरू फर्स्टगेट ड्राइभको ९१०० ब्लकमा रहेको घरमा पुग्दा त्यहाँ माझी छुरा प्रहारबाट सख्त घाइते अवस्थामा थिए ।
३३ वर्षीय सूर्य भुजेलले ९११ मा प्रहरीलाई फोन गरेर आफूले आफ्ना साथी ३६ वर्षीय बुद्धि माझीलाई छुरा प्रहार गरेको बताएपछि प्रहरी घटनास्थलमा पुगेको थियो । अदालतका कागजातका अनुसार भुजेलले माझीसँग झगडा गरेपछि घरभित्र पसेर भान्साको चक्कु लिएर माझीको छातीमा प्रहार गरेको जनाइएको छ ।
माझीलाई अस्पताल लगिएको थियो जहाँ उनको एकघण्टापछि मृत्यु भएको थियो। माझीलाई माउन्ट कार्मेल ईस्ट अस्पताल लगिएको थियो, जहाँ उनलाई बिहान साढे ३ बजे मृत घोषणा गरिएको थियो।
घटना राती साढे २ बजे भएको थियो । भुजेललाई घटनास्थलबाटै पक्राउ गरी लिकिङ काउन्टी कमन प्लीज कोर्टमा जघन्य हत्याको अभियोग लगाइएको छ । भुजेललाई हाल लिकिङ काउन्टी कारागारमा राखिएको छ । प्रारम्भिक सुनुवाई अक्टोबर ५ का लागि तोकिएको छ । सूर्य भुजेलपनि भुटानी शरणार्थीका रुपमा पुनर्वास कार्यक्रम अन्तरगत नै अमेरिका आएको जनाइएको छ ।
माझीको दाहसंस्कारका लागि गोफण्डमीमा रकम संकलन समेत भइरहेको छ । यदि तपाई पनि सहयोग गर्न चाहनुहुन्छ भने यहाँ क्लीक गर्नुहोला ।
