साउदीमा अलपत्र परेका श्रीमानलाई नेपाल झिकाइदिन हारगुहार गरिरहेकी चन्द्रिका

सुरज घिमिरे

---

प्रकाशित मिति : भाद्र २१, २०८० बिहीबार

सप्तरीकी चन्द्रिका साहु, करिब १५ दिनदेखि वैदेशिक रोजगार विभागको कार्यालयमा धाइरहेकी छिन् । उनी वैदेशिक रोजगार विभाग धाउनुको एउटै कारण हो, उनको श्रीमान विदेशमा अलपत्र पर्नु ।

चन्द्रिकाका श्रीमान देवनारायण साहु झण्डै तीन महिना अघि रोजगारीको शिलशिलामा साउदी अरेयिबा गएका थिए । विदेशमा अलपत्र परेको श्रीमानलाई झिकाईदिन हारगुहार गर्दै विभागको कार्यालयमा धाइरहेकी छिन् । उनी भन्छिन्, ‘श्रीमान साउदी जानुभएको छ । दुई महिना बित्न आट्यो । हामी धेरै पटक वैदेशिक रोजगार विभागमा धाइरहेका छौं । केही सुनुवाई भएको छैन ।’

चन्द्रिकाका श्रीमान देवनारायण विगत ७ दिनदेखि साउदीमा विरामी परेका छन् । विरामी परेको समयमा पनि बन्धक बनेर बस्नुपरेको उनी बताउँछन् । श्रीमानलाई कम्पनीले औषधीको व्यवस्था त परैको कुरा राम्रोसँग खाना खान पनि नदिएको उनले बताईन् । ‘आज ७ दिन भइसक्यो । ज्वरो आएर सिकिस्त हुनुभएको छ । कम्पनीले औषधी पनि दिएको छैन् ।’ – उनले भनिन् ।

विदेशमा श्रीमान मृत्युको मुखमा पर्दै जाँदा विभागले ४५ दिन झिकाउन नसकिने बताएको उनले बताईन् । ‘श्रीमान उता मृत्युको मुखमा पर्दै जानुभएको छ । खाना खान पनि दिएको छैन । बस्ने ठाउँमा बिजुली पनि काँटिदिएको छ ।’ चन्द्रिकाले भनिन्- ‘यता ४५ दिनसम्म मान्छे आउँदै आउँदैन भन्नुभएको छ ।’

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

देवनारायण बसुन्धारामा रहेको अल फारुक ओभरसिज मेनपावरको माध्यमबाट साउदी पुगेका थिए । तर, म्यानपावरले जुन कामका लागि भनेर साउदी पठाएको थियो न त्यो काम नै पाए न खानबस्नका लागि व्यवस्था नै भयो । देवनारायण यसअघि पनि वैदेशिक रोजगारीको लागि कतार पुगेका थिए । कतारको सप्लाई कम्पनीमा काम गरेको देवनारायण त्यहाँ पनि फसिन पुगे ।

म्यानपावर कम्पनीले लोभ लालच देखाएर जबरजस्ती श्रीमानलाई साउदी पठाएको उनले आरोप लगाईन् । चन्द्रिकाले भनिन्- ‘पहिले अर्कै कम्पनीमा काम गर्नुभएको थियो । त्यो मा भएन् । यसमा नसोधेर म्यानपावरले पठाइदियो । १५ महिना पहिले नै भिषा आएको थियो । त्यसमा पठाइदिएको छ । मेरो बुढो जाने बेलामा पनि भन्नुभएको थियो, म सप्लाई कम्पनीमा कतारबाट फसेर आएको छु । अरु कम्पनीमा भए अहिले नै जान चाहान्छु । तर, श्रीमानलाई जबरजस्ती पठाइदियो ।’

देवनारायणले साउदी जानको लागि म्यानपावरलाई सुरुमा १ लाख ६० हजार बुझाएका थिए । म्यानपावरले कम्पनी राम्रो भएको र धेरै पैसा कमाई हुने लोभमा देखाएपछि उनले पुनः ४० हजार बुझाए ।

देवनारायणलाई कम्पनीले खाना नदिएपछि सँगै काम गर्नेहरुले भुजा तथा चिउराहरु लैदिने गरेको उनकी श्रीमति चन्द्रिका बताउँछिन् । श्रीमानले भुजा तथा चिउरा खाएरै दिन कटाइरहेको दुखेसो गरिन् । चन्द्रिकाले भनिन्-  ‘मेरो श्रीमान मुत्युको मुखमा पुग्न थाल्नुभएको छ । खाना पनि दिएको छैन्, कोठा पनि छैन् । लाईन पनि छैन् । अरु अरु मान्छेहरु भुजा, चिउराहरु लगिदिन्छन् । त्यही खाएर बस्नुभएको छ ।’

सप्तरीमा आफ्ना ७ र ९ वर्षका छोराहरुलाई छाडेर श्रीमानलाई झिकाउन मद्धत माग्दैँ चन्द्रिका १५ दिनदेखि काठमाडौंमा हार गुहार गरिरहेकी छिन् ।  काठमाडौंमा बस्दा ४० हजार खर्च भइसकेको उनको भनाई छ । ‘काठमाडौंमै बसेको ४० हजार खर्च भइसक्यो । १५ दिन देखि धाइरहेकी छु । दुई वटा छोरा छन् । छोरालाई कसैले पनि खाना पकाएर खाना दिँदैनन् । छोराहरु साना साना छन् । एउटा ९ वर्षको र अर्को ७ वर्षको छोरो छ घरमा । घर पनि छैन् । बारेको घरमा बस्छौं ।’- उनले भनिन ।

उनी श्रीमानलाई नेपाल झिकाउन भन्दै कहिले मेनपावर कम्पनी त कहिले विभाग धाइरहेकी छन् । तर, कतैबाट पनि आफुले न्याय नपाएको उनको गुनासो छ ।

खाडी मुलुकमा नेपाली कामदारहरू अलपत्र पर्ने तथा ठगिमा पर्ने घटना वैदेशिक रोजगार विभागको लागि नौलो होइन् ।  विभागका अनुसार पछिल्लो समय विदेशमा अलपत्र पर्ने तथा ठगीमा पर्ने घटनाहरु बढेका छन् । विभागले विदेशमा अलपत्र परेकाहरुको उद्धारको लागि सम्बन्धित मेनपावरसँग समन्वय गरि नेपाल झिकाउन पहल गरिरहेको विभागको दाबी छ ।