अमेरिकामा रहेको फाउण्डेशनले दियो छक्का प्रहार गरेका नेपाली क्रिकेटरलाई एक-एक लाख पुरस्कार
प्रकाशित मिति : भाद्र २१, २०८० बिहीबार
अमेरिकामा रहेको इन्स्पायर नोबल फाउण्डेशनले भारतविरुद्ध छक्का प्रहार गरेका नेपाली क्रिकेटरलाई पुरस्कार रकम प्रदान गरेको छ । त्रिपुरेस्वरस्थित नेपाल खेलकुद पत्रकार मञ्चको कार्यालयमा आयोजित कार्यक्रममा फाउण्डेशनले क्रिकेटर सोमपाल कामी र कुशल भुर्तेललाई जनही एक एक लाख रुपैयासहित सम्मान गरेको हो ।
चलचित्र निर्देशक चन्द्र पन्त अध्यक्ष रहेको फाउण्डेशनले एसिया कप–२०२३ अन्तर्गत भारतविरुद्धको खेलमा प्रत्येक छक्का र विकेट लिए पावत ५० हजार दिने र विजयी भएमा टोलीलाई ५ लाख रूपयाँ दिने घोषणा गरेको थियो । सोही अनुरुप फाउण्डेशनले नेपाल खेलकुद पत्रकार मञ्चको रोहवरमा सोमपाल र कुशललाई एक–एक लाख रुपैयाँ प्रदान गरेको हो । कुशल र सोमपालले भारतविरुद्ध दुई दुई छक्का प्रहार गरेका थिए ।
कुशल र सोमपाललाई फाउण्डेशनका नेपाल प्रतिनिधी सुशील रेग्मीले चेक हस्तान्तरण गरेका थिए। कार्यक्रम नेपाल खेलकुद पत्रकार मञ्चका पूर्वअध्यक्ष अजय फुयालको उपस्थितिमा सम्पन्न भएको हो । पुरस्कृत भएपछि दुवै खेलाडीले यसबाट आफूहरूलाई थप हौसला मिलेको बताउँदै फाउण्डेशनलाई धन्यवाद दिएका छन् ।
अमेरिकामा रहेका फाउन्डेसनका अध्यक्ष पन्तले खेलाडीलाई आगामी दिनका लागि उत्साहित बनाउन रकम प्रदान गरिएको बताएका छन् । आफ्नो संस्थाले सकारात्मक सन्देश दिन नेपाली क्रिकेट टोली देश फर्किएको भोलीपल्टै घोषणा गरेबमोजिम रकमप्रदान गरेको अध्यक्ष पन्तले बताए ।
