प्रवासी नेपालीहरूलाई वंशजको नाताको आधारमा दोहोरो नागरिकताको माग गर्दै पिटिसन
प्रकाशित मिति : श्रावण २५, २०८० बिहीबार
प्रवासी नेपालीहरूलाई वंशजको नाताको आधारमा नेपालको संविधानमा दोहोरो नागरिकताको व्यवस्थाको माग गर्दै नेपाली डायस्पोरा सन्जालले अनलाईन पिटिसन शुरू गरेकोछ। वंशजको नाताको आधारमा दोहोरो नागरिकताको एक सुत्रीय माग पुरा गर्ने लक्ष राखेर अनलाइन पिटिसन सुरु गरिएको हो ।
प्रवासी नेपालीहरूको अभिष्ट एक पटकको नेपाली संधैको नेपाली भन्ने भावनात्मक एकतालाई मूर्तरूप दिन प्रवासी नेपालीहरूलाई वंशजको नाताको आधारमा नेपालको संविधानमा दोहोरो नागरिकताको व्यवस्था गर्ने लक्ष लिएर अमेरिकाको न्यूजर्सीमा स्थापना र दर्ता भएको नेपाली डायस्पोरा सन्जालले यो अभियान सुरु गरेको हो । सन्जालले सरोकारवाला सबैलाई अनलाईन पिटिसनमा सहभागी भएर नेपालको संविधानमा वंशजको नाताको आधारमा दोहोरो नागरिकताको व्यवस्थाको मागलाई पुरा गर्न योगदान दिन अपील गरेको छ।
नेपाली डायस्पोरा सन्जालका तर्फबाट श्री प्रसाद पराजुली, मिलन कुमार शाही, प्रदीप परियार थापा मगरले जारी गरेको वक्तव्यमा दोहोरो नागरिकताले नेपाली डायस्पोराका एनआरएनहरूलाई मात्र फाइदा पुग्ने नभई नेपालको समग्र प्रगति, समृद्धि र कल्याणमा ठूलो योगदान पुर्याउने दृढ विश्वास रहेको जनाइएको छ । पिटिसनमा हस्ताक्षर गर्दै विश्वव्यापी छलफलहरू प्रारम्भ गर्न, सान्दर्भिक सरोकारवालाहरूलाई संलग्न गर्न र दोहोरो नागरिकताका नीतिहरू लागू गर्नका लागि आवश्यक कदमहरू चाल्ने दिशामा अगाडि बढ्न सम्पूर्ण नेपाली डायस्पोरालाई आव्हान गरिएको छ ।
नेपाली डास्पोरालाई वंशजको नाताको आधारमा दोहोरो नागरिकताको व्यवस्था गर्न आवश्यक हुनुका कारणहरु पनि वक्तव्यमा सुचिकृत गरिएको छ । जसमा दोहोरो नागरिकताले व्यक्तिहरू र तिनीहरूको मूल देशहरू बीचको सम्बन्धलाई बलियो बनाउने, दोहोरो नागरिकताले नेपालको अर्थतन्त्र र समृद्धिमा सकारात्मक प्रभाव पार्न सक्ने, दोहोरो नागरिकता सांस्कृतिक सम्बन्ध, पैतृक सम्बन्ध र आफ्नो वंशजको सम्पदालाई कायम राख्नको लागि महत्त्वपूर्ण रहेको र आप्रवासनको विश्वव्यापी प्रकृति तथा यसले ल्याउने अवसरहरू पहिचान गर्न सकिने वक्तव्यमा उल्लेख छ ।