अध्ययनका लागि अमेरिका आएका २६ बर्षीय उज्जवल थापाको सपना समाप्त, शव नेपाल पठाइदै
प्रकाशित मिति : श्रावण ५, २०८० शुक्रबार
अध्ययनका लागि अमेरिका आएका २६ बर्षीय उज्जवल थापाको मृत्युपछि शव नेपाल पठाइने भएको छ । उनको शव भोलि कतार एयरवेजमार्फत फिलाडेल्फियाको एयरपोर्टबाट नेपाल फिर्ता पठाउने तयारी भइरहेको मेरिल्याण्डका लागि नेपाली मूलका राज्य सांसद ह्यारी भण्डारीले जानकारी दिए ।
सन् २०१६ मा विद्यार्थी भिसामा अमेरिका आएका थापाको जुलाईको पहिलो साता अलाबामामा मृत्यु भएको थियो । अलाबामाबाट शव नेपाल पठाउन समस्या भएपछि उनको शव मेरिल्याण्ड ल्याइएको र सकभर भोलि नेपाल पठाइने भण्डारीले जानकारी दिए । अझै केही कागजात मिलाउन बाँकी रहेको र सकभर भोलि नै शव नेपाल पठाइने उनले बताए ।
थापाको शव नेपाल पठाउन र परिवारलाई सघाउन आर्थिक सहयोग जुटाउने उद्देश्यले गोफण्डमी एकाउन्ट समेत बनाइएको थियो । जसमा झण्डै ४५ हजार डलर संकलन भएको छ । उनको शव नेपाल पठाउनका लागि खोलिएको गोफण्डमीमा अमेरिकामा रहेका नेपाली विद्यार्थीहरुले उल्लेख्य सहयोग गरेका छन् ।
उनको लोपस रोगका कारण निधन भएको र परिवारको अनुरोधमा शव नेपाल पठाइने जनाइएको छ । सुरुमा अलाबामाबाट शव नेपाल पठाउन खोजिएपनि विमानस्थल टाढा भएपछि र धेरैवटा ट्रान्जिट हुँदै लैजानुपर्ने अवस्था भएपछि फ्युनरल डाइरेक्टरले उडान बुक गर्न सकेका थिएनन् । त्यसपछि राज्य सांसद भण्डारीले सहयोग अगाडि बढाएका थिए ।
भण्डारीले एक महिनाको अवधिमामात्र ५ जना नेपालीको दाहसंस्कार, शव नेपाल पठाउन र परिवारका सदस्यहरुलाई दाहसंस्कारमा अमेरिकामा ल्याउनका लागि सहयोग गरिसकेका छन् । त्योभन्दा अगाडि पनि भण्डारीले शव नेपाल पठाउन र दाहसंस्कारका लागि नेपाली समुदायमा उल्लेख्य सहयोग गर्दै आएका छन् । कोरोना महामारीमा अस्पतालमा नेपालीका शव पहिचान गर्न र फ्युनेरल होम नपाउँदा समेत दाहसंस्कारका लागि फ्युनेरल होम मिलाउन भण्डारीको सहयोग उल्लेखनीय थियो ।