मौलिक झाँकी सहित अमेरिकाभरका मगरहरु भोलि कोलोराडोमा, नयाँ नेतृत्व चयन गरिने
प्रकाशित मिति : श्रावण १२, २०८० शुक्रबार
मगर संघ अमेरिका केन्द्रीय समितिको ९ औ महाधिवेशन जुलाई २९ मा कोलोराडोको बोल्डरमा हुने भएको छ । अमेरिकाको मूल प्रवाहमा मगरहरुको उपस्थिति र सहभागिता ( उदाउदो मगर पुस्तालाई मगर भाषा , संस्कार , संस्कृति र नेतृत्व हस्तान्तरण आजको आवश्यकता भन्ने मूल नाराको साथ अमेरिकाका विभिन्न राज्यका मगरहरुको जमघट कोलोराडोमा हुने भएको हो ।
मगर संघ अमेरिका केन्द्रीय समितिको आयोजना र मगर संघ अमेरिका कोलोराडो च्याप्टरको मुख्य व्यवस्थापनमा महाधिबेशन हुन लागेको अध्यक्ष कुलदीप राना मगरले बताए । अहिलेसम्म अधिवेशनहरु न्युयोर्क , न्युजर्सी र मेरिल्याण्ड आसपासमा मात्र हुँदै आइरहेकोमा पहिलोपटक त्योभन्दा बाहिर गर्न लागिएको हो । अधिवेशनले नयाँ कार्यसमिति निर्वाचित गर्नेछ ।
मगर संघ अमेरिका केन्द्रीय समितिका सल्लाहकार लछुमन राना मगरको संयोजकत्वमा लक्ष्मी राना मगर र डा कृष्ण थापा मगर सदस्य रहेको निर्वाचन कमिटी बनाइएको छ । निर्वाचन कमिटीले मनोनयन दर्ता देखि निर्वाचनको कार्यतालिका सार्वजनिक गरेको छ । मनोनयन दर्ता जुलाई १८ देखि जुलाई २४ सम्म, जुलाई २६ मा उम्मेदवारी फिर्ता देखि उम्मेदवार उपर दाबी बिरोध र जुलाई २७ मा उम्मेदवारको अन्तिम नामावाली सार्वजनिक गरिने छ । जुलाई २९ मा दिउसो ३ बजेबाट निर्वाचनका गतिबिधि अगाडी बढाइनेछ ।
समुदघाटन समारोह , बन्द सत्र र बधाई तथा सुभकामना सांस्कृतिक साँझ गरि कार्यक्रम ३ चरणमा सम्पन्न हुनेछ । मगर मौलिक झाँकी सहित बिभिन्न राज्यबाट आएका मगरहरु सभाहलमा प्रवेश गर्नेछन , झाँकी सहितको टोलीलाई मुख्य ब्यबस्थापक कोलोराडो च्याप्टरले स्वागत गर्नेछ । बिभिन्न विधाका बिभिन्न व्यक्तिहरुलाई सम्मान पनि गरिनेछ ।
मगर संघ अमेरिकाको स्थापना सन २००४ मार्च २८ मा न्युयोर्कमा गरिएको हो। संस्थापक अध्यक्ष दल बहादुर बुढाथोकी मगर हुन् भने संघले हाल ६ राज्यमा च्याप्टरबिस्तर गरेको छ ।