‘बच्चा निकाल्दा आन्द्रा नै काटिदिए’
प्रकाशित मिति : श्रावण ३०, २०७४ सोमबार
श्रावण ३०, २०७४- भेरी अञ्चल अस्पताल नेपालगन्जका चिकित्सकले शल्यक्रिया गरी बच्चा निकाल्ने क्रममा पिसाब नली र दिसा गर्ने आन्द्रा काटिदिएपछि बाग्चौर नगरपालिका–२ ठिनबाङकी १९ वर्षीया नीतु सुनारको ज्यान जोखिममा परेको छ ।
भारतको लखनऊस्थित सामरा अस्पतालमा दुई साताभन्दा बढी समय उपचार गरी फर्के पनि अझै स्वास्थ्यमा सुधार नआएको परिवारले जनाएको छ । उनी ८ महिनादेखि उपचारत छिन् । लखनऊको सामरा अस्पतालले दिसा–पिसाब बाहिर निस्कन पेटको छेवैबाट पाइप जडान गरे पनि समस्या उस्तै रहेको पति भोला सुनारले बताए । आर्थिक समस्याले औषधि किन्न समस्या भएपछि स्थानीय आमा समूहले १ लाख ४१ हजार रुपैयाँ सहयोग गरेको छ । समूहको सहयोगपछि शल्यक्रियाका लागि सामरा अस्पतालमा पठाएको हो । भेरी अस्पतालले बच्चा निकाल्न गत पुस २० मा नीतुको शल्यक्रिया गरेको थियो । ‘शल्यक्रियाको ४ दिनपछि टाँका फुकाउन आउनू भनेर अस्पतालबाट डिस्चार्ज गरिदिए । दोस्रो दिनबाटै पत्नीको पेट दुख्न थाल्यो । त्यसपछि तेस्रो दिनमै अस्पताल पुग्यौं । त्यसपछि मात्र टाँका काटियो तर अन्य उपचार नगरी पुन: डिस्चार्ज गरियो,’ उनले भने, ‘अस्पतालमा कार्यरत हेमा छन्त्यालले थप उपचार यहाँ हुन सक्दैन भन्दै घर फर्काइन् तर अवस्था सामान्य नभएपछि लखनऊ लगियो । सामरा अस्पताल लगेपछि मात्र नली काटिएको थाहा पाइयो ।’ नीतुको पाठेघरमा बच्चा ठूलो भएको र पानीको मात्रा कम भएको भन्दै चिकित्सकले शल्यक्रिया गरेको उनले जनाए । भारतमा उपचार गराउँदा २६ लाखभन्दा बढी खर्च भएको र उपचार थालेको ८ महिनासम्म पनि कुनै सुधार नआएको उनको भनाइ छ । ‘अझै आईसीयूमा राखेर उपचार गराइरहेको छु । भएको सबै रकम र सम्पत्ति सकियो । अब औषधि खुवाउने खर्चसमेत छैन,’ उनले भने, ‘कहाँबाट जुटाउने, चिन्ताले पिरोलेको छ ।’ रकम जुटाउन नगरपालिकाको सिफारिस बोकी सहयोग माग्दै हिँडेको उनले सुनाए । उनले अस्पतालसँग क्षतिपूर्ति दिन र संलग्न चिकित्सकलाई कारबाही गर्न मागसमेत
गरेका छन् ।