न्युयोर्कको ब्रुकलिनमा लिकबाट खस्यो एल ट्रेन, २ सय यात्रुलाई बाहिर निकालियो
प्रकाशित मिति : असार ११, २०८० सोमबार
न्युयोर्कको ब्रुकलिनमा एल ट्रेन आंशिक रूपमा लिकबाट खसेपछि २०० भन्दा बढी यात्रुहरूलाई बाहिर निकालिएको अधिकारीहरूले सोमबार बताएका छन् । आइतबार राति भएको घटनामा कुनै मानवीय क्षति भने भएको छैन ।
म्यानहट्टन जाने एल ट्रेन पहिलो स्टेशन क्यानार्सी रकवे पार्कवे स्टपबाट राति ८ बजेर ४७ मिनेटमा आंशिक रूपमा लिकबाट बाहिर खसेको थियो । ट्रेन एक ट्र्याकबाट अर्को ट्र्याकमा जाँदै गर्दा दुई पाङ्ग्रे भएको एकल एक्सेलले ट्र्याक छाडेको थियो । यसले रेलको चौथो र पाँचौं कारहरू अलिकति छुट्याएको थियो ।
घटनापछि रेलको पछाडिका करिब २ सय यात्रुहरु रेलबाट ओर्लिएर प्लेटफर्ममा गएका थिए । जबकि पहिलो चारवटा डिब्बामा सवार अन्य आठजनाले बाहिर निस्कनका लागि अर्को रेल नआउञ्जेल कुर्नुपरेको थियो । दुर्घटनाको कारण अनुसन्धान भइरहेको छ ।