टेक्सासमा ६ नेपाली चढेको कारलाई ट्रकले ठक्कर दिंदा ११ बर्षका बालकसहित २ को मृत्यु, ४ घाइते
प्रकाशित मिति : असार ४, २०८० सोमबार
टेक्सासको टाइलरमा शनिबार बेलुका ६ जना नेपाली चढेको कारलाई पिकअप ट्रकले ठक्कर दिंदा २ जना नेपालीहरुको मृत्यु भएको छ भने अरु ४ जना घाइते भएका छन् । दुर्घटनामा ३४ बर्षका बर्षका श्रृजन ज्ञवाली र ११ बर्षका बालक इमेज कार्कीको मृत्यु भएको हो ।
दुर्घटनामा दिनेश कार्की, गंगा कार्की, इभान कार्की र श्रृजन प्याकुरेल घाइते भएका छन् । श्रृजन प्याकुरेलको अवस्था सामान्य रहेको तर अरु तीनजनाको अवस्था भने गम्भिर रहेको जनाइएको छ । तीनैजनाको अस्पतालमा उपचार भइरहेको छ ।
घाइते दिनेश कार्की र गंगा कार्की घटनामा ज्यान गुमाउने ११ बर्षका बालक इमेज कार्कीका बुबाआमा हुन् । घाइते अर्का बालक ६ बर्षका इभान कार्की पनि दिनेश कार्की र गंगा कार्कीका छोरा हुन् । मृतक श्रृजन ज्ञवालीले पनि कार्की परिवारको स्टोरमा काम गर्दै आएका थिए ।
खराब मौषमपछि घरमा विद्युत आपूर्तिमा अवरोध भएपछि ६ जना नै एउटै गाडीमा चढेर साथीको घरतिर जाँदै गर्दा दुर्घटना भएको जनाइएको छ । मृतक श्रृजन ज्ञवाली परिवारमा कमाउने एकमात्र व्यक्ति रहेको र नेपालमा बृद्ध बुबाआमाहरु रहेको जनाइएको छ ।
एकदिन अगाडिमात्र श्रृजन ज्ञवालीको नेपालमा रहेका बुबाआमासँग कुराकानी भएको र ज्ञवालीले बुबाआमालाई अमेरिका ल्याउने कुरा गरेको पारिवारिक श्रोतको भनाई छ । श्रृजन ज्ञवालीका बुबाआमा आर्थिक अवस्था कमजोर भएका कारण श्रृजन ज्ञवालीको मामाघरमा बस्दै आएको जनाइएको छ ।
दुर्घटनामा घाइते गंगा कार्कीले सन् २०१८ मा पनि दुर्घटनामा परेर कैयन महिना अस्पतालमा विताउनुपरेको थियो । पुरानो दुर्घटनाबाट स्वास्थ्यलाभ गरिरहेको अवस्थामा नयाँ दुर्घटनाको सामना गर्नुपरेको हो ।
घाइतेहरुको उपचार र मृतकको दाहसंस्कारका लागि गोफण्डमीमा आर्थिक सहयोग अभियान सुरु गरिएको छ । संकलित रकम दाहसंस्कारको खर्च, मेडिकल बिल, कानूनी खर्च, तत्काल परिवारका लागि सहयोगमा खर्च गरिने जनाइएको छ । १ लाख डलरको लक्ष्यसहित सुरु गरिएको आर्थिक संकलन अभियानमा अहिलेसम्म झण्डै २१ सय डलर जम्मा भएको छ ।
तपाई पनि सहयोग गर्न चाहनुहुन्छ भने यहाँ क्लीक गर्नुहोला ।
नेपाली समुदायमा अत्यन्तै दुखद घटना भएको र घाइतेको उपचार र मृतकको दाहसंस्कारको लागि सक्दो सहयोग गर्न टेक्सासबाट सुरेश दर्पण पोखरेलले आव्हान गरेका छन् ।