ब्याक टू नेपालको सन्देश लिएर अमेरिकाका ५० राज्यहरूमा पुग्दै पुष्कर शाह, एटलान्टाबाट सुरु
प्रकाशित मिति : जेष्ठ १९, २०८० शुक्रबार
ब्याक टू नेपालको सन्देश लिएर अमेरिकाका ५० राज्यहरूमा पुग्न विश्व साइकल यात्री पुष्कर शाहले एटलान्टास्थित मार्टिन लूथर किंग सेन्टरबाट साइकलयात्रा सुरु गरेका छन् । महात्मा गान्धीको सालिक अघिल्तिर उभिएर स्वाभिमान नेपालको परिवर्तनका निमित्त संकल्प गर्दै अमेरिकाको एटलान्टाबाट ब्याक टू नेपाल अभियान प्रारम्भ भएको प्रेम बानियाले जानकारी दिए ।
मातृभूमि नेपाल यतिवेला इतिहासकै एक कठीन समयमा गुज्रिरहेको तथा चरम राजनीतिक अस्थिरताका कारण देशको आर्थिक, सामाजिक र चारित्रिक संकट निकै गहिरिएको कारण यो अभियान सुरु गर्नुपरेको जनाइएको छ । देशको कार्यपालिका, न्यायपालिका र संसदीय अंगहरु अत्यन्त कमजोर र डरलाग्दो असन्तुलनमा रहेको तथा लाखौंलाख युवाशक्ति परदेशिएको छ र देशभूमि बाँझै रहेको अवस्थामा चाहेर पनि यो अत्यासलाग्दो जनशक्ति पलायन कसैले कहिँबाट रोक्न नसकेको अभियानले जनाएको छ ।
अभियानले भनेको छ -‘देशको आर्थिक अवस्था अत्यन्त कमजोर बन्दा यसले चौतर्फी असर गाडेको छ । इतिहासमा यस्तो अकल्पनीय समय पनि आयो मुलुकमा कि आफ्ना सन्तानहरुलाई विदेश पठाएर तिनले पठाएको रेमिट्यान्सबाट घरखर्च चलाउनु पर्ने परिस्थिती छ ! सन्तानलाई स्वदेशमै कर्म दिन नसकेर खर्च चलाउन अर्काको देश धकेल्नुपर्ने यति डरलाग्दो समय शायदै इतिहास थियो । यस्तो समय अझ धेरै वर्ष लम्बियो भने देशले कल्पना नै गर्न नसक्ने गरी आफ्ना सन्तानहरुलाई गुमाउने छ र देश पुनर्निमाणको सम्भावना अत्यन्त कमजोर हुनेछ ।’
त्यसैले समयमै सचेत भएर आफ्नो मातृभूमिका लागि यो पहलकदमी लिएको भन्दै संसारका हरेक कुनामा रहेका नेपाल आमाका सन्तानहरुलाइ नेपाल फर्कन आव्हान गरिएको छ । आआफ्ना फरकफरक परिस्थिती, बाध्यता र रहरले लाखौं नेपालीले देश छाडेपनि यो परिस्थितीलाई कसैनकसैले आफ्नो जिम्मेवारी मानेर देशरक्षार्थ एक ऐतिहासिक अठोट गर्न जरुरी भएकाले यो अभियान चलाइएको जनाइएको छ ।
अभियानले भनेको छ -‘छरिएर रहेका आफ्ना सन्तानहरुलाई आह्वान गरेर एक पटक मातृभूमि निर्माणमा नलगाउने हो भने देश कहिल्यै बन्दैन । सके सन्तानहरु स्वदेश फर्किउन्, सकेनन् यदि भने तिनले के सक्छन् त्यही स्वदेश फर्काउने पवित्र संकल्प हो यो अभियान । ब्याक टू नेपाल आह्वान गर्दछ विदेशमा सिकेको सिप, शिक्षा, प्रविधि, लगानी के सकिन्छ त्यो स्वदेश फर्काउँ । देशप्रतिको माया फर्काउँ, देशप्रतिको सम्मान फर्काउँ, सिप, शिक्षा, ज्ञान, विवेक, जे छ तपाईंसँग त्यसलाई फर्काउँ ।’