अमेरिकी सिनेटर लिन्डसे ग्राहमलाई पक्राउ गर्न रुसबाट वारेन्ट जारी, ग्राहमले व्यक्त गरे खुशी
प्रकाशित मिति : जेष्ठ १५, २०८० सोमबार
रुसको आन्तरिक मन्त्रालयले सोमबार युक्रेनमा भएको लडाइसँग सम्बन्धित टिप्पणी गरेपछि अमेरिकी सिनेटर लिन्डसे ग्राहमलाई पक्राउ गर्न वारेन्ट जारी गरेको छ । शुक्रबार युक्रेनी राष्ट्रपति भोलोडिमिर जेलेन्स्कीसँगको भेटको भिडियोमा साउथ क्यारोलिनाका रिपब्लिकन सिनेटर ग्राहमले रूसीहरू मर्दै गरेको र युक्रेनमा भएको अमेरिकी सैन्य सहयोगलाई अमेरिकाले सबैभन्दा राम्रो ठाउामा खर्च गरेको रकम भएको बताएका थिए ।
जेलेन्सीको कार्यालयले सार्वजनिक गरेको भिडियोमा ग्राहमले कुराकानीको विभिन्न भागहरूमा टिप्पणी गरेको देखिएको छ । युक्रेनको राष्ट्रपति कार्यालयको छोटो भिडियोले रुसमा आक्रोश निम्त्याएको छ । रूसी राष्ट्रपति भ्लादिमिर पुटिनका प्रवक्ता दिमित्री पेस्कोभले यस्ता सिनेटरहरू हुनु देशको लागि ठूलो लज्जाको विषय भएको बताएका थिए ।
To know that my commitment to Ukraine has drawn the ire of Putin’s regime brings me immense joy.
I will continue to stand with and for Ukraine’s freedom until every Russian soldier is expelled from Ukrainian territory.
— Lindsey Graham (@LindseyGrahamSC) May 29, 2023
रुसको शीर्ष आपराधिक अनुसन्धान एजेन्सी अनुसन्धान समितिले ग्राहम विरुद्ध आपराधिक अनुसन्धान खोलेको छ । त्यसपछि रुसको गृह मन्त्रालयले उनको गिरफ्तारीको लागि वारेन्ट जारी गरेको वान्टेड आपराधिक संदिग्धहरूको आधिकारिक रेकर्डले देखाएको छ । रुसले आफ्नो देशमा प्रवेश गर्न प्रतिबन्ध लगाएका २०० भन्दा बढी अमेरिकी सांसदहरुमध्ये ग्राहम एक हुन् ।
ग्राहमले ट्वीटरमा टिप्पणी गर्दै युक्रेनप्रतिको आफ्नो प्रतिबद्धताले पुटिनलाई रिस उठेको थाहा पाउँदा ठूलो आनन्द मिलेको बताएका छन् । उनले हरेक रुसी सैनिकलाई युक्रेनी भूभागबाट निष्कासन नगरेसम्म युक्रेनप्रतिको समर्थन जारी रहने बताएका छन् । पुटिनको भ्रष्ट र अनैतिक सरकारले जारी गरेको गिरफ्तारी वारेन्टलाई सम्मानको प्रतीकको रूपमा लगाउने उनले बताएका छन् ।