अमेरिकी भिसामा शुल्कबृद्धि मे ३० बाट लागु नहुने
प्रकाशित मिति : जेष्ठ ११, २०८० बिहीबार
अमेरिकी भिसा शुल्कबृद्धि मे ३० बाट लागु नहुने भएको छ । अमेरिकी सरकारको विदेश मन्त्रालयले मे ३० बाट गैर आप्रवासी र विशेष भिसाको शुल्क बढाउने घोषणा गरेकोमा अब यो शुल्कबृद्धि लागु हुने म्याद पछाडि सारिएको छ । अब शुल्कबृद्धि जुन १७ देखि लागु हुने तय भएको छ । कंग्रेसनल रिभ्यु ऐन बमोजिम तयार गरिएको प्रतिवेदन अमेरिकी सिनेटमा पठाउन ढिलो भएका कारण शुल्कबृद्धि लागु हुनमा ढिलाई भएको हो ।
जुन १७ देखि लागु हुने शुल्कबृद्धि अनुशार भिजिटर भिसा लगायत ईबाहेक सबै गैर आप्रवासी भिसाका लागि १६० डलर शुल्क लाग्दै आएकोमा त्यसलाई बढाएर १८५ डलर बनाइने भएको छ । भिजिटर भिसा, विद्यार्थी भिसा, ट्रान्जिट भिसा, मिडिया भिसा लगायतका अधिकांश गैर आप्रवासी भिसाका लागि अहिलेसम्म भिसा शुल्क १६० डलर रहेको छ । ब्यापारी, लगानीकर्ता लगायतका लागि प्रदान गरिने ई श्रेणीको भिसा शुल्क २०५ डलरबाट बढाएर ३१५ डलर बनाइने भएको छ ।
त्यस्तै रोजगारमा आधारित कामदार र गैर आप्रवासी भिसाहरुहरुको शुल्क १९० डलर रहदै आएकोमा २०५ डलर बनाइने भएको छ । एच, एल, ओ, पी, क्यु, आर लगायतका श्रेणीका यस्ता भिसाको शुल्क बढाइने भएको हो ।
त्यस्तै २ बर्षसम्म नयाँ भिसा नलिनेगरी जे भिसा लिएकाहरुलाई छुट दिनुपरेको खण्डमा छुट आवेदनका लागि १२० डलर लिइदै आएकोका त्यसमा भने शुल्क नबढाइने भएको छ । निश्चित प्रकारका जे भिसावाहकहरु अमेरिकाबाट फर्केपछि २ बर्ष अमेरिका जान नपाउने प्रावधान रहेकोमा २ बर्षअगाडि जानुपरेमा छुटको आवेदन दिन आवश्यक हुन्छ ।
प्रस्तावित नियममा उल्लेख गरिएको तुलनामा भिसाशुल्क कममात्र बढाइने भएको छ । प्रस्तावित नियममा अन्तिम नियमको तुलनामा सबैशुल्क यो भन्दा धेरै बढाउने प्रस्ताव गरिएको थियो । तर आएका कमेन्टहरुको मूल्यांकन गरेर कममात्र भिसा शुल्क बढाइने भएको हो । विभिन्न प्रकारका भिसा शुल्कहरु बढाउँदा अमेरिकी सरकारलाई २७ करोड, ४१ लाख २० हजार ५९५ डलर आम्दानी हुने अपेक्षा गरिएको छ ।
नेपालीको भिजिटर भिसा आवेदनबाट मात्र अमेरिकी दूतावासलाई गतबर्ष ४७ करोड आम्दानी
नेपालीको भिजिटर भिसा आवेदनबाटमात्र अमेरिकी दूतावासलाई गत आर्थिक बर्ष २०२२ मा झण्डै ४७ करोड नेपाली रुपैया आम्दानी भएको छ । अमेरिकी सरकारको ब्यूरो अफ कन्सुलर अफ कन्सुलर अफेयर्सले जारी गरेको तथ्यांक अनुशार पछिल्लो विनिमयदरले हिसाव गर्दा आम्दानी झण्डै ४७ करोड नेपाली रुपैया आम्दानी भएको देखिएको हो ।
भिजिटर भिसा आवेदकको संख्यालाई हरेकको १६० डलरको दरले हिसाब गर्दा यो रकम निस्किएको हो । जुन झण्डै ३६ लाख अमेरिकी डलर हुन आउँछ । अमेरिकी दूतावास काठमाडौंले कतिपय सेवाका लागि १ डलर बराबर १३५ नेपाली रुपैया समेत लिने गरेको छ । अमेरिकी विदेश मन्त्रालयको तथ्याक हिसाब गर्दा आर्थिक बर्ष २०२२ मा झण्डै २२ हजार ७ सय २९ जना नेपालीहरुले अमेरिकाको भिजिटर भिसाका लागि आवेदन दिएका थिए ।
आर्थिक बर्ष २०२१ को तुलनामा २०२२ मा अमेरिकाको भिजिटर भिसाका लागि आवेदन दिने नेपालीहरुको संख्या दोब्बरभन्दा धेरै रहेको थियो । आर्थिक बर्ष २०२१ मा झण्डै ८ हजार ७ सय ६० जना नेपालीहरुले अमेरिकाको भिजिटर भिसाका लागि आवेदन दिएका थिए । तीमध्ये अधिकांश पहिले पनि भिसा लिएका र विना अन्तरवार्ता भिसा नविकरणका लागि आवेदन दिएकाहरु थिए ।
कोरोना महामारीका कारण अमेरिकी दूतावास काठमाडौंले नियमित सेवा संचालन गर्न नसकेका कारण पनि आर्थिक बर्ष २०२१ मा कम नेपालीले अमेरिकाको भिजिटर भिसाका लागि आवेदन दिएका थिए । गतबर्ष नेपालीका भिजिटर भिसाका आवेदनबाट अमेरिकी दूतावासलाई झण्डै १४ लाख अमेरिकी डलर आम्दानी भएको थियो ।
अमेरिकी दूतावासहरूले भिसा शुल्कबाट हुने आम्दानी आवेदकहरूलाई भिसा प्रशोधनलगायत कन्सुलर सेवाहरू उपलब्ध गराउने लागत कभर गर्न प्रयोग गर्छन् । यसमा कुशल र सुरक्षित भिसा सेवाहरू प्रदान गर्न आवश्यक स्टाफ, सुविधा, उपकरण, र प्रविधिको लागत समावेश छ।
भिसा शुल्कबाट संकलित रकम एक छुट्टै खातामा जम्मा गरिन्छ र दूतावास वा वाणिज्य दूतावासको सञ्चालनलाई सहयोग गर्न विशेष रूपमा प्रयोग गरिन्छ। अमेरिकी सरकारले आवधिक रूपमा यी सेवाहरू प्रदान गर्ने लागतहरू कभर गरिएको सुनिश्चित गर्न भिसा प्रशोधन सहित विभिन्न कन्सुलर सेवाहरूको लागि शुल्कको समीक्षा र समायोजन गर्दछ।