अमेरिकामा मुख्यालय रहेको १४ औं अन्तर्राष्ट्रिय तेक्वान्दो प्रतियोगिता दक्षिण कोरियामा
प्रकाशित मिति : बैशाख २८, २०८० बिहीबार
अमेरिकामा मुख्यालय रहेको अन्तर्राष्ट्रिय खुला मैत्री तेक्वान्दो प्रतियोगिता (आइओएफटिसी) को १४ औं संस्करण दक्षिण कोरियामा हुने भएको छ । कोरियन मार्सल आर्ट्स तेक्वान्दोको आयोजनामा दक्षिण कोरियाको सोलमा सन् २०२४ मा १४ औँ अन्तर्राष्ट्रिय खुला मैत्री तेक्वान्दो प्रतियोगिता आयोजना गरिने भएको हो ।
अन्तर्राष्ट्रिय खुला मैत्री तेक्वान्दो प्रतियोगिताको प्रमुख कार्यालय अमेरिकाको पोर्टल्यान्डमा रहेको छ । १४ औँ संस्करणको आयोजना गर्ने जिम्मेवारी सोललाई दिइएको १४ औँ इन्टरनेसनल ओपन फ्रेन्डसीप तेक्वान्दो च्याम्पियन्सीपका एकजना संयोजक अन्तर्राष्ट्रिय खेलाडी तथा अन्तर्राष्ट्रिय रेफ्री राजु क्षेत्रीले विज्ञप्तीमार्फत जनाएका छन् ।
प्रतियोगितामा ग्रान्डमास्टर डाक्टर लि पनि कार्यक्रम संयोजकको भूमिकामा रहने जनाइएको छ । गत मार्चमा आइओएफटिसीका संस्थापक तथा निर्देशक ग्रान्डमास्टर दिवाकर महर्जन तथा महासचिव केरेन ब्लाकलेजले दक्षिण कोरियाको सोल शहरलाई आयोजनाको जिम्मेवारीस्वरुप आइओएफटिसी झन्डा हस्तान्तरण गरेका थिए । आइओएफटिसीले प्रत्येक दुई वर्षमा इन्टरनेसनल ओपन फ्रेन्डसीप तेक्वान्दो च्याम्पियनसीपको आयोजना गर्दै आएको छ ।
आइओएफटिसीले पालैपालो एक संस्करण अमेरिका र अर्को संस्करण अमेरिका बाहिर गर्दै आएको छ । जसअनुसार आइओएफटिसीको प्रमुख कार्यालय रहेको पोर्टल्यान्डमा पाँच संस्करण, नेपालमा चार संस्करण, भारत, बेलायत र हङकङ र अमेरिकाकै मिचिगनमा एक–एक संस्करणको आयोजना भइसकेको छ ।
दक्षिण कोरियामा भने पहिलो पटक अन्तर्राष्ट्रिय खुला मैत्री तेक्वान्दो प्रतियोगिता सञ्चालन हुन लागेको हो । दुई वर्षअघि मिचिगनमा सफलतापूर्वक अन्तर्राष्ट्रिय खुला मैत्री तेक्वान्दो प्रतियोगिता सम्पन्न भइसकेको छ ।
प्रतियोगितामा नेपाल, दक्षिण कोरिया,अमेरिका, फिलिपिन्स, अस्ट्रेलिया, अष्ट्रिया, क्यानाडा, पाकिस्तान, भारत, हङकङ, चिन, मेक्सिकोलगायतका राष्ट्रको सहभागिता रहनेछ । प्रतियोगितामा करीब सात सयभन्दा बढी खेलाडीले भाग लिने अपेक्षा आयोजकको छ ।
अन्तर्राष्ट्रिय खुला मैत्री तेक्वान्दो प्रतियोगितामा सिनियर पुरुष र महिलाको समान आठ, आठ तौल समूहमा प्रतिस्पर्धा हुनेछ । यसैगरी, जुनियरतर्फ महिला र पुरुष गरी दस–दस तौल समूह र क्याडेट वर्गमा दस–दस तौल समूहमा खेलाइनेछ । सिनियर, जुनियर र क्याडेट पुम्सेमा व्यक्तिगत, जोडी र टिम गरी तीन इभेन्टमा प्रतिस्पर्धा हुनेछ । यसबाहेक बोर्ड ब्रेकिङ इभेन्ट पनि सामेल गरिएको छ ।
प्रतियोगितामा कूल ६५ स्वर्ण पदक, ६५ रजत पदक र १३० काश्य पदकका लागि प्रतिस्पर्धा हुनेछ । यसबाहेक बोर्ड ब्रेकिङ इभेन्टमा पनि पदक दिइनेछ ।