अमेरिकाको न्युजर्सीको घरको छतमा खस्यो अरबौं वर्ष पुरानो तातो उल्का पिण्ड, भुइँमा क्षति
प्रकाशित मिति : बैशाख २६, २०८० मंगलबार
अमेरिकाको न्युजर्सीका एक परिवारले सोमबार दिउँसो आफ्नो घरको छतमा उल्का पिण्ड ठोक्किएपनि सबै सुरक्षित रहेको भन्दै आभार व्यक्त गरेका छन् ।
होपवेल पुलिस विभागले जारी गरेको विज्ञप्ति अनुसार उल्का पिण्ड मानिने धातुको वस्तु घरको छानामा ठोक्किएको थियो। यो आयातकार बस्तु चार इन्च लामो र ६ इन्च चौडाईको रहेको छ ।
घरको छत र सिलिंगहुँदै उल्कापिण्ड भुइँमा खसेको थियो । प्रहरीले जारी गरेको तस्बिरले क्षतिग्रस्त र फुटेको भुइँको छेउमा उल्कापिण्ड देखाएको छ। घरमा बस्ने सुजी कोपले उल्कापिण्ड उनको बुबाको सुत्ने कोठामा खसेको थियो । तर घरमा कोही थिएनन्। बुबा वा अरु कोही नभएको बेलामा खसेको भन्दै उनले भगवानलाई धन्यवाद दिएकी छिन् ।
कोठामा भग्नावशेषको बीचमा उल्कापिण्ड भेटिएपनि सुरुमा घरमा बस्नेहरुले यो कसैले फ्याँकेको ढुंगा ठानेका थिए । तर छाम्दा यो तातो रहेको थियो । आपतकालिन उद्दारकर्ताहरु आएर वस्तुबाट कुनै दीर्घकालिन प्रभाव भए नभएको जाँच गरेका थिए ।
प्रहरीले वस्तुको सकारात्मक पहिचान गर्न र बासिन्दा तथा वस्तुको सुरक्षा गर्न मद्दतको लागि अन्य धेरै एजेन्सीहरूसँग सम्पर्क गरेको बताएको छ । प्रहरीले यो बस्तुलाई मध्य अप्रिलदेखि मेको अन्तिमसम्म चलिरहेको उल्का वर्षासँग जोड्न सकिने बताएको छ । त्यस्तै थप अनुसन्धान जारी रहेको प्रहरीले जनाएको छ ।
फ्र्याङ्कलिन इन्स्टिच्युटका प्रमुख खगोलशास्त्री डेरिक पिट्सले यो वस्तु अरबौं वर्ष पुरानो हुन सक्ने तथा सौर्यमण्डल जत्तिकै पुरानो हुन सक्ने बताएका छन् । यो लामोसमय अन्तरिक्षमा घुमिरहेको र अब यो पृथ्वीमा आएर घरमा खसेको उनले बताए । यस्तो घटना वास्तवमै असामान्य रहेको र इतिहासमा धेरै कम पटक भएको जनाइएको छ ।