८१ बर्षका दुई हजुरआमाहरुले गरे ८० दिनमा विश्वका विभिन्न देशको भ्रमण
प्रकाशित मिति : चैत्र २६, २०७९ आईतबार
अमेरिकाको टेक्सास निवासी ८१ बर्षका दुई हजुरआमाहरुले ८० दिनमा विश्वका विभिन्न देशको भ्रमण गरेर साहसिक कार्यका लागि उमेरको सीमा नहुने प्रमाणित गरेका छन् । एक वृत्तचित्र फोटोग्राफर एली ह्याम्बी र एक चिकित्सक तथा लेक्चरर स्यान्डी हेजलिपले बालीको समुद्र तटदेखि इजिप्टको मरुभूमिसम्म साहसिक यात्रा गर्दै ८० दिनमा संसारको भ्रमण गरे।
यी हजुरआमाहरूले जनवरी ११ मा आफ्नो महत्वाकांक्षी साहसिक कार्य सुरु गरेका थिए । तिनीहरूको पहिलो स्टप अन्टार्कटिका थियो, जहाँ धेरै अनुभवी यात्रुहरू समेत पुगेका छैनन् ।
सबैभन्दा दक्षिणी महाद्वीपमा पुग्नको लागि पहिले ड्रेक प्यासेज पार गर्न आवश्यक थियो । जुन दक्षिण अमेरिकाको दक्षिणी छेउ र अन्टार्कटिकाको दक्षिण शेटल्याण्ड टापुहरू बीचको कुख्यात पानी मानिन्छ ।
लगभग दुई दिनसम्म आफूहरु ड्रेक प्यासेजमा घुमिरहेको र चिप्लेटी खेलेको उनीहरुले बताए । जब उनीहरुले अन्टार्कटिकको जमिनमा पाइला टेके, तब उनीहरुले सबै कष्टहरु विर्सेको बताए । अन्टार्कटिकको सौन्दर्य पेन्गुइनहरू, आइसबर्गहरू र ग्लेशियरहरूमा हेर्दा अविश्वसनीय र अचम्मको रहेको उनीहरुले बताए ।
यी हजुरआमाहरुले प्रायः मिल्दो शर्टहरू लगाएर सबै सात महाद्वीपहरूमा १० देशहरूको भ्रमण गरिसकेका छन् । उनीहरुले टिकटक, इन्स्टाग्राम र फेसबुकमा यात्रा गर्ने हजुरआमाहरुलाई ट्र्याक गर्ने फ्लोअरहरु पनि प्राप्त गरेका छन् ।
ह्याजलिपले सन् १९९९ मा आफ्नो श्रीमानको मृत्युपछि ह्याम्बीलाई भेटेकी थिइन्। श्रीमानले मृत्यु हुनुअघि समरमा नातिनातिनाहरूलाई मिसन यात्रामा लैजान थाल्नुपर्ने विचारको बिउ आफ्नो हृदयमा रोपेको उनले बताइन् । यसले उनलाई जाम्बिया मेडिकल मिसनमा पुर्यायो, जुन दक्षिणी अफ्रिकामा ह्याम्बी र उनको पतिद्वारा सञ्चालित परियोजना थियो ।
दुबैजना यात्रामा साझा चासो र विदेशमा आराम र सुविधाहरू भन्दा अद्वितीय अनुभवहरूलाई प्राथमिकता दिने प्रतिबद्धतामा बाँधिएका थिए। सन् २००५ मा ह्याम्बीको श्रीमानको मृत्यु भएपछि दुवै जना विधवा भएर नजिक भए ।
उनीहरूको यात्राको लागि विचार तिनीहरू ८० वर्षमा पुग्नु केही वर्ष अघि उत्पन्न भएको थियो। उनीहरूले आफ्नो स्वर्गीय पति केली र डनप्रति यात्रा समर्पित गरे।
तिनीहरूले अन्य वृद्ध यात्रुहरूलाई पनि उमेरले उनीहरूलाई रोक्न नदिने प्रोत्साहन दिएका छन् । उमेरले उनीहरूको विदेश यात्रालाई असर नगर्ने उनीहरुको भनाई छ । हेजेलिपले ८१ वर्षलाई आफ्नो यात्रामा लाग्नको लागि उत्तम उमेर भनेर वर्णन गरेकी छिन् ।