बेलायतमा नेपाली विद्यार्थी जागिर र कोठा नपाएर हैरान

खसोखास अमेरिका ब्यूरो

---

प्रकाशित मिति : चैत्र २५, २०७९ शनिबार

Photo by Pixabay on Pexels.com

‘बेलायतमा नेपाली घर भाडामा तथा रोजगारका अवसरहरु फेसबुक पेज’ मा एक विद्यार्थीले पीडा पोख्दै सोधेका छन्, ‘यूके आएको पनि दुई महिना भइसक्यो । अहिलेसम्म काम नपाउने म मात्र हो कि अरु पनि हुनुहुन्छ ?’

अध्ययनका लागि दुई महिना अघि आएका उनी बेलायतको बर्मिङ्हम बस्छन् ।

उक्त पोष्टमा जवाफ दिंदै एक जनाले सान्त्वना दिएकी छन्, ‘मैले पनि चार महिना काम नपाइ बसेको थिएं । शुरु शुरुमा राम्रो काम खोज्ने होइन क्लिनिङ र भाडा टल्काउने तिर पाए पनि जानुपर्छ । कमसेकम खाना र कोठाभाडा दिने पैसा त हुन्छ । अनि विस्तारै अरु काम खोज्दा नि हुन्छ ।’

उक्त पोष्टमा कतिले अढाइ महिनादेखि काम नपाएको बताएका छन् भने कतिपयको कम्तीमा तीन महिना कुर्नु पर्ने जवाफ छ ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

यसले पनि चित्रण गर्छ कि अहिले अध्ययनका लागि बेलायत आएका विद्यार्थीहरु काम र कोठा पाउने समस्याबाट पीडित छन् । अन्तर्राष्ट्रिय विद्यार्थी र वर्क परमिटमा आउने कामदारका डिपेन्डेन्ट एकैपटक आउंदा जागिर र कोठा समस्या भएको जानकारहरु बताउंछन् । ऋण जोरजाम गरेर बेलायत आइपुगेका विद्यार्थीलाई काम नभए यहांको महंगी र विश्वविद्यालय फिले थप प्रताडित बनाउने गर्छ ।

ब्रेक्जिटपछि बेलायत सरकारको उदार अध्यागमन नीतिका कारण अहिले नेपालीसहित अन्तर्राष्ट्रिय विद्यार्थीहरुको ओइरो छ । अध्ययनका लागि कति नेपाली विद्यार्थी बेलायत आए त्यसको यकीन तथ्यांक छैन् तर उल्लेख्य मात्रामा विद्यार्थी आएका विभिन्न निकायले जनाएका छन् ।

सन् २० २१ मा करिब १० हजार नेपाली विद्यार्थी बेलायत आएको अनुमान छ । बेलायतको फितलो भिजा प्रक्रियाका कारण सेप्टेम्बर इन्टेकमा झण्डै १५ हजारसम्म विद्यार्थी आउने दावी कन्सल्टेन्सीहरुको छ । ति विद्यार्थीले विश्वविद्यालयलाई वार्षिक झण्डै १५ देखि २० लाख रुपैयां फि तिर्छन् ।

लन्डनस्थित नेपाली दूतावासकी नियोग उपप्रमुख रोशन खनाल सरकारसंग तथ्यांक राख्ने मेकानिजम नभएकाले विद्यार्थी आगमन संख्या ठ्याक्कै भन्न नसकिने बताउंछिन् । विद्यार्थीहरुले पनि आफ्ना समस्याबारे दूतावासमा सम्पर्क नगरेका उनले बताइन् ।

सन् २०२१, २२ मा ६ लाख ७९ हजार ९७० जना अन्तर्राष्ट्रिय विद्यार्थी अध्ययनका लागि बेलायत आएको तथ्यांक छ । ति मध्ये ५ लाख ५९ हजार ८२५ जना ईयू बाहिरका र एक लाख २० हजार १४० विद्यार्थी ईयू देशका थिए ।

सन् २०२२ मा ४ लाख ८५ हजार ७ सय ५८ मुख्य आवेदकको भिसा स्वीकृत भएको होम अफिसको तथ्यांकमा छ । यो कोभिड अगाडि भन्दा झण्डै ८१ प्रतिशत माथि हो ।

गृह मन्त्रालयको तथ्यांकले तीन वर्षमा विदेशी विद्यार्थीका डिपेन्डेन्ट आउने क्रम झण्डै पांच गुणाले बढेको देखाएको छ ।

सन् २०१९ मा १३ हजार ६ सय ६४ डिपेन्डेन्ट यूके आएकामा सन् २०२२ को जुनसम्म यो संख्या बढेर ८१ हजार ८९ पुगेको छ । अण्डर ग्रयाजुएट विद्यार्थीले डिपेन्डेन्ट ल्याउन पाउंदैनन् तर मास्टर्स र डक्टोरेट गर्नेलाई ल्याउन पाउने सुविधा छ ।

अन्तर्राष्ट्रिय विद्यार्थीले बेलायती अर्थतन्त्रमा ठूलो योगदान गरेका छन् । दि हाइअर एजुकेशन स्टाटिसटिक्स एजेन्सीका अनुसार सन् २०२० ०२१ मा अन्तर्राष्ट्रिय विद्यार्थीले ९ दशमलव ९५ बिलियन पाउण्ड ट्यूसन फिमात्र तिरेका छन् ।

लन्डनस्थित यूनी ल्याडर कन्सल्टेन्सीका सञ्चालक गणेश खड्का अन्तिम समयमा अप्लाइ गर्ने विद्यार्थीलाई बेलायत आउने बित्तिकै काम र कोठा समस्या हुने बताउंछन् ।

‘धेरै जसो विद्यार्थी आज भिजा लागेर पर्सी आउन खोज्छन् । एयरपोर्टबाटै काम खोजेर त कहां सम्भव हुन्छ’, खड्काले भने, ‘बेलायतमा अवसर र चुनौति दुवै छ । त्यसलाई विद्यार्थीले सामना गर्न सक्नुपर्छ ।’

६ महिना अगाडि भिजा लगाउन मिल्ने भएकाले बेलैमा अप्लाइ गरेर आउन सुझाव दिन्छन् खड्का ।

नेपालबाट आएका विद्यार्थी नेपाली समुदायमै निर्भर हुंदा पनि कोठा समस्या बढी देखिएको छ । लेटिङ एजेन्ट्समार्फत जांदा विद्यार्थीले हाइ डिपोजिट, पे स्लिप, रिफरेन्स आदि व्यवस्था गर्नुपर्ने भएकाले विद्यार्थी नेपाली वा एसियन समुदायभित्रै सिमित हुन खोज्छन् जसले समस्या भएको हो ।

‘युनिभर्सिटीको अकोमोडेसन महंगो भएकाले विद्यार्थी त्यता जांदैनन् । सस्तो खोज्दा समस्या भएको हो’, खड्का भन्छन् । त्यसो त यतिखेर कोठा भाडा बढेर अचाक्ली भएको छ ।

सामान्तया ५ देखि ६ सय पाउण्डसम्म पाइने डबल रुमको भाडा अहिले कम्तीमा ८ सय पाउण्ड र तीनसयमा पाइने बक्स रुमको भाडा ५ सय हाराहारी पुगेको छ । बैंक ब्याजदर वृद्धिसंगै मोर्गेज एवं उर्जा शुल्कवृद्धिका कारण पनि घर भाडा बढेको बताइन्छ ।

बेलायत सरकारले आप्रवासीप्रति कठोर कानून बनाउने तयारी गरेको खवर आइसकेको छ । विशेष गरि, न्यून गुणस्तरका डिग्री अध्ययन गर्न आउने विद्यार्थी र तिनका डिपेन्डेन्ट रोक्ने सरकारको प्रस्ताव छ ।

बेलायती प्रधानमन्त्री ऋषि सुनकले युरोपबाट गैर कानूनी रुपमा आफ्नो सिमाना पार गरेर आएका आप्रवासीहरूलाई बेलायतमा शरणार्थी भिसा नदिने समेत बताइसकेका छन् ।

गृह मन्त्रालय (होम अफिस) लाई सुझाव सल्लाह दिने समिति माइग्रेसन एड्भाइजरी कमिटीले भने अन्तर्राष्ट्रिय विद्यार्थीले बेलायती अर्थतन्त्रमा ठूलो योगदान दिइरहेकाले उनीहरुलाई नियन्त्रण गर्न नहुने सुझाव दिएको छ ।

नेपाली लिङ्कबाट