न्युयोर्कको म्यानहटनबाट अमेरिकनहरुको आव्हान -‘नेपालबारे अनुभव गर्न नेपाल जाऔं’
प्रकाशित मिति : चैत्र १८, २०७९ शनिबार
न्युयोर्कको म्यानहटनमा आयोजित एक कार्यक्रममा सहभागी अमेरिकनहरुले नेपालबारे अनुभव गर्न नेपाल भ्रमणमा जान आव्हान गरेका छन् । नेपाल–अमेरिका कूटनीतिक सम्बन्धको ७५ औँ वर्षगाँठको उपलक्ष्यमा न्यूयोर्कस्थित नेपालको महावाणिज्य दूतावासले आयोजना गरेको कार्यक्रममा सहभागीहरुले जीवनको अद्वितीय अनुभवका लागि नेपालको भ्रमण गर्नुपर्ने बताए ।
नेपालको प्राकृतिक सौन्दर्यदेखि आतिथ्य सत्कारको अनुभव लिएर आफूलाई मानसिक रुपमा समेत रिचार्ज गर्नका लागि नेपाल भ्रमण गर्नुपर्नेमा सहभागीहरुले जोड दिएका थिए । कार्यक्रममा अमेरिका र नेपालबीचको न्यानो द्विपक्षीय सम्बन्धलाई सुदृढ र विस्तार गर्न पर्यटन र व्यक्तिगत सम्पर्कको भूमिकामा जोड दिइएको थियो।
प्रमुख वक्ताहरूले पर्यटन र जनता जनसम्पर्कका विभिन्न पक्षहरूमा आ आफ्ना विचार राखेका थिए । कार्यक्रममा राष्ट्रसंघका लागि नेपाल मिसन र महावाणिज्य दूतावास न्युयोर्कका अधिकारीहरु, अमेरिकी विदेश मन्त्रालयका अधिकारी, पाटा न्यूयोर्क च्याप्टरका अधिकारीहरू, मिडिया, र ट्राभल एण्ड टुर बिजनेसका कार्यकारीहरूको उपस्थिति थियो।
कार्यक्रममा न्यूयोर्कस्थित संयुक्त राष्ट्र संघका लागि नेपालका राजदूत तथा स्थायी प्रतिनिधि अमृतबहादुर राईले मनोरञ्जन, साहसिक, सांस्कृतिक र आध्यात्मिक सिकाइ र उपचार योगको माध्यमबाट व्यक्तिगत र व्यावसायिक विकासका लागि नेपालको अन्तर्राष्ट्रिय पर्यटन केन्द्र बन्न सक्ने बताए ।
अमेरिकी विदेश मन्त्रालयको अफिस अफ फरेन मिसनका क्षेत्रीय निर्देशक अलेक्ज्याण्डर हार्डिनले शुभकामना व्यक्त गर्दै अमेरिका र नेपालबीचको सकारात्मक सम्बन्ध, दुई देशबीच बढ्दो सामुदायिक र सांस्कृतिक सम्बन्धको चर्चा गर्दा त्यस्ता प्रयासहरूको लागि निरन्तर सहयोग रहने बताए ।
न्युयोर्कमा रहेको नेपाली महावाणिज्यदूतावासका कार्यवाहक महावाणिज्यदूत विष्णु गौतमले नेपालको पर्यटन सम्भाव्यता भित्रको पुनर्कल्पनाको अवधारणा र यसले व्यक्तिगत वृद्धि, सामुदायिक सशक्तिकरण र पर्यटन व्यवसायको पुनरुत्थानमा गरेको योगदानबारे प्रकाश पारेका थिए । प्यासिफिक एसिया ट्राभल एसोसिएसन पाटा न्युयोर्क र क्षेत्री एण्ड एसोसिएट्ससँगको सहकार्यमा आयोजना गरिएको कार्यक्रमले साहसिक अनुभवलाई परिवर्तनकारी अनुभवका रूपमा जोड दिएको थियो।
पाटा न्यूयोर्क च्याप्टरका अध्यक्ष जोबर्ट ओपुलेन्सियाले एसिया प्यासिफिक क्षेत्रको पर्यटन सम्भावनाको बारेमा चर्चा गर्दौ ट्राभल र टुर अपरेटरहरूलाई नेपाललाई असाधारण प्राकृतिक र सांस्कृतिक सम्पदा र न्यानो हृदय भएका मानिसहरूका कारण उत्कृष्ट गन्तव्यको रूपमा हेर्न प्रोत्साहित गरेका थिए ।
पर्वतारोही तथा छ पटक गिनिज वल्र्ड रेकर्ड होल्डर भेनेसा ओब्रायनले पर्वतारोहणमा नेपालको नेतृत्वको बारेमा चर्चा गरिन् । उनले नेपालका आफ्ना रोचक सम्झनाहरू बताउँदै उचाइमा पुग्ने, चेतनाको माध्यमबाट साहस खोज्ने र मानव क्षमताका सीमाहरू खोज्नेहरूका लागि नेपाल नै अन्तिम गन्तव्य भएकोमा जोड दिइन्।
लेखक र अनुभवी ट्रेकर डाक्टर सेठ सिक्रोफले यसपटक एडमन्ड हिलारी र तेन्जिङ नोर्गेद्वारा सगरमाथाको पहिलो सफल आरोहणको ७०औँ वार्षिकोत्सव मनउदै गर्दा हिलारीको पहलले द्विपक्षीय र जनता जनताबीचको सम्बन्धलाई प्रवर्द्धन गर्न, सद्भावना निर्माण गर्न र नेपालमा जीवनस्तर उकास्न महत्वपूर्ण भूमिका खेलेको बताए ।
एनआरएनए अमेरिकाका पूर्व अध्यक्ष तथा सोसलिस्ट इन्टरनेशनलका उपाध्यक्ष खगेन्द्र जीसीले नेपालको कला, संस्कृति र व्यक्ति–व्यक्ति सम्पर्कको प्रवर्द्धनमा डायस्पोराको भूमिकालाई प्रकाश पारे ।
टर्किस एयरलाइन्सको न्यूयोर्कस्थित क्षेत्रीय मार्केटिङ प्रबन्धक अल्प ओजामानले टर्किस एयरलाइन्सले अमेरिका र नेपाललाई सीधै जोडेर नेपालको पर्यटन प्रवर्द्धनमा योगदान पुर्याइरहेको र थप अमेरिकी आगन्तुकहरूलाई नेपालमा जान थप प्रोत्साहन गर्न परिचयात्मक यात्रालाई आर्थिक सहयोग गरिरहेको बताए।
कार्यक्रममा कार्यवाहक महावणिज्यदूत गौतमले यात्रुहरूको हित र सुरक्षाका लागि हालै नेपालले चालेका ट्रेकिङ उपायहरूलगायत कार्यक्रममा उठेका प्रश्नहरूको जवाफ दिएका थिए । कार्यक्रमको संचालन महावािणज्यदूतावासकी उपवाणिज्यदूत संगिता न्यौपानेले गरेकी थिइन् ।
कार्यक्रमले नेपालको पर्यटन सम्भाव्यता र पर्यटन, सामुदायिक सशक्तिकरण र जनता–जनताबीचको सम्बन्धको माध्यमबाट व्यक्तिगत विकासलाई प्रवर्द्धन गर्ने देशको प्रयासलाई देखाएको थियो ।
