अमेरिकामा विनाशकारी आँधी : धनजनको ठूलो क्षति, ९३ हजार जनता अन्धकारमा बस्न बाध्य
प्रकाशित मिति : चैत्र १७, २०७९ शुक्रबार
अमेरिकाको दक्षिणी राज्य अर्कान्सासमा शुक्रबार आएको विनाशकारी आँधीले ठूलो क्षति पुर्याएको छ । राष्ट्रिय मौसम सेवाका अनुसार करिब २ करोड ८० लाख मानिस यस आँधीको चपेटामा परेका छन् ।राष्ट्रिय मौसम सेवाले अवस्थालाई ‘धेरै गम्भीर’ भनेको छ।
उत्तरपूर्वी इलिनोइस, उत्तरपश्चिम इन्डियाना, दक्षिणी विस्कॉन्सिन, र लेक मिशिगन टोर्नाडोबाट सबैभन्दा बढी प्रभावित क्षेत्रहरू हुन्। प्रभावित क्षेत्रमा ११० किलोमिटरभन्दा बढी हावाको गति र ठूलो असिना पर्न सक्ने खतरा रहेको छ । यस आँधीका कारण अर्कान्सासमा विद्युत आपूर्ति ठप्प भएको छ । प्रदेशका ९३ हजार जनता अन्धकारमा बस्न बाध्य भएको अनुमान छ ।
अर्कान्सासको सबैभन्दा ठूलो सहर लिटिल रक यस टोर्नाडोबाट धेरै प्रभावित भएको छ। मेयर फ्रान्क स्कट जुनियरले ट्वीटरमा लेखेका छन्, ‘अहिलेसम्म हामीलाई खबर आएर अनुसार लिटिल रकको अस्पतालमा २४ जना मानिस घाइते भएर भर्ना भएका छन् ।’
At this time, we know of 24 people who have been hospitalized at Little Rock hospitals and we are not aware of any fatalities in Little Rock at this time. Property damage is extensive and we are still responding. #LRwx #ARwx
— Frank Scott, Jr. (@FrankScottJr) March 31, 2023
यस आँधीका कारण धनमालमा ठूलो क्षति पुगेको उनले बताए । राज्यका धेरै ठाउँमा रुख ढलेका कारण सडकमा सवारी आवागमन प्रभावित भएको छ । धेरै मानिसका घर ध्वस्त भएका छन् ।
योसँगै लिटिल रकबाट १७० किलोमिटर उत्तरपूर्वमा रहेको वेन सहर पनि आँधीको चपेटामा परेको छ ।
अर्कान्सासका गभर्नर साराह स्यान्डर्सले ट्वीटरमा लेखेकी छन्, “राज्य स्रोतको उचित प्रयोगका लागि नयाँ जानकारी र निर्देशनहरू उपलब्ध गराउन स्थानीय अधिकारीहरूसँग सम्पर्कमा छु। कृपया स्थानीय अधिकारीहरूको निर्देशन पालना गर्नु होला ।”