इतिहासकै उच्च तहमा राजनीतिक उत्पीडन र चुनावी हस्तक्षेप: डोनाल्ड ट्रम्प
प्रकाशित मिति : चैत्र १६, २०७९ बिहीबार
म्यानहटन ग्रान्ड जूरीले अभियोग लगाउन मतदान गरेपछि पूर्व राष्ट्रपति डोनाल्ड ट्रम्पले बिहीबार यसबारे प्रतिक्रिया दिदै यो घटना इतिहासको उच्चतम स्तरमा राजनीतिक उत्पीडन र चुनावी हस्तक्षेप बताएका छन् ।
उनले भनेका छन् – ‘यो इतिहासकै उच्च तहमा राजनीतिक उत्पीडन र चुनावी हस्तक्षेप हो।’
ट्रम्प टावरको सुनौलो एस्केलेटरबाट आफू ओर्लिएदेखि नै र आफूले अमेरिकाको राष्ट्रपतिको रूपमा सपथ लिनु अघि नै मेक अमेरिका ग्रेट अगेन आन्दोलनलाई नष्ट गर्न डेमोक्रेयाट्सहरु लागि परेको ट्रम्पले आरोप लगाएका छन् । कट्टरपन्थी वाम डेमोक्र्याट्हरु अमेरिकाका मेहनती जनताका दुश्मन भएको उनले आरोप लगाएका छन् ।
‘रूस, रूस, रूस, मुलर होक्स, युक्रेन, युक्रेन, युक्रेन, महाभियोग होक्स १, महाभियोग होक्स २, मार ए लागोमा अवैध र असंवैधानिक छापा पछि अहिले यो’ भन्दै ट्रम्पले आक्रोश व्यक्त गरेका छन् । डेमोक्र्याटहरूले आफूलाई समाप्त पार्न झूट बोलेको र धोका दिएको ट्रम्पको आरोप छ ।
निर्दोष व्यक्तिलाई निर्दोष चुनावी हस्तक्षेपको कार्यमा अभियोग लगाउँदै उनीहरूले अकल्पनीय काम गरेका ट्रम्पले बताएका छन् । अमेरिकाको इतिहासमा यसअघि कहिल्यै यस्तो नभएको भन्दै ट्रम्पले आफ्नो अभियानमा जासुसी सहित डेमोक्र्याटहरूले दशकौंमा अनगिन्ती पटक धोका दिएको आरोप लगाएका छन् ।
राजनीतिक प्रतिद्वन्द्वीलाई सजाय दिनको लागि अमेरिकाको न्याय प्रणालीलाई हतियार बनाएको आरोप लगाउँदै ट्रम्पले म्यानहटन डिस्ट्रिक्ट एटोर्नी एल्भिन ब्राग घिनलाग्दो भएको बताएका छन् ।
न्युयोर्क शहरमा अभूतपूर्व अपराधको लहरलाई रोक्नुको सट्टा बाइडेनको फोहोरी काम गरेको भन्दै ट्रम्पले यो कदम बाइडेनका लागि घातक हुने चेतावनी दिएका छन् । कट्टरपन्थी वामपन्थी डेमोक्र्याटहरूले के गरिरहेका छन् भन्ने कुरा अमेरिकी जनताले बुझेका छन् भन्दै ट्रम्पले कुटिल डेमोक्र्याटहरू मध्ये प्रत्येकलाई अफिसबाट बाहिर निकाल्ने र अमेरिकालाई फेरि महान बनाउने बताएका छन् ।