‘अमेरिकामा मैले पैसा कमाउन गरेको संघर्षलाई पहाडै फोडेको भन्दिन’ -उषा पौडेल, कलाकार

खसोखास अमेरिका ब्यूरो

---

प्रकाशित मिति : चैत्र ११, २०७९ शनिबार

अमेरिका निवासी कलाकार उषा पौडेलले आफूले भाग्यमा एकदमै विश्वास गर्ने र आफूलाई भाग्यले तानेर अमेरिका ल्याएको बताएकी छिन् । नेपालबाट बलिउडमा भाग्यले तानेर लगेजस्तै अमेरिका पनि भाग्यले नै तानेर ल्याएको उनले बताइन् । उनी बिमलेश अधिकारीसँगको युट्युब शो द बोल्ड टक वीथ बिमको अन्तिम श्रृंखलामा बोल्दै थिइन् ।

चर्चित कलाकार उषा पौडेलले लक्ष्मीप्रसाद देवकोटाको कृति मुनामदन लगायत ४० भन्दा धेरै चलचित्रमा अभिनय गरिसकेकी छिन् । ८ वटा टेलिभिजन सिरिज र ३ दर्जन बढी म्युजिक भिडियोमा अभिनय गरेकी उनले बलिउडमा तुझ सङ प्रित लगै सज्ना, जय जय बजरङ्ग बली, अदालत, चिन्टु छिन्की अर एक बढी सि लभ स्टोरी लगायतमा अभिनय गरिन् । उनी झण्डै ७ बर्षदेखि अमेरिकामा बस्दै आएकी छिन् ।

आफ्नो बाल्यकाल अभावमा वितेको स्मरण गर्दै उनले त्यसपछि हासिल गरेका उपलब्धीहरु र अमेरिकाको बसाईका लागि भाग्यमानी अनुभव गर्ने उनले बताइन् । उनले भनिन् – ‘मैले धेरै धनी मान्छे सडकमा आएको पनि देखेको छु । सडकमा खाना खान नपाउने मान्छे धनी भएको पनि देखेकी छु । मेरो बाल्यकाल राम्रो थिएन । धेरै अभावहरु थियो । त्यो स्थानबाट आएका कारण आफूलाई भाग्यमानी अनुभव गर्छु ।’

सधै आफ्नो वरपर भगवान भएको अनुभव गर्ने र भगवानको हात आफ्नो टाउकोमाथि भएको अनुभव गर्ने उनले बताइन् । अमेरिका आएपछि साथीहरुको साथ र सहयोग पाएकाले कहिले पनि एक्लो अनुभव नभएको उनले बताइन् । उनले भनिन् – ‘पैसा कमाउन दुख त गर्नैपर्छ । अमेरिकामा आफूले त्यसका लागि गरेको मिहिनेतलाई भयंकर पहाडै तोडेको भन्न चाहन्न ।’

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

कुराकानीका क्रममा उनले बम्बईमा आफूले बलिउडमा गरेको संघर्षलाई पनि सम्झिइन् । नेपालमा स्थापित भइसकेको मान्छे बम्बईमा गएर जिरोबाट सुरु गर्दा सुरुमा निराश भएको तर पनि संघर्ष गर्न र प्रयास गर्न नछाडेको उनले बताइन् ।

कलाकार मनिषा कोइराला आफ्नो प्रेरणाको सबैभन्दा ठूलो श्रोत भएको उनले बताइन् । आफू बाल्यकालदेखि नै मनिषा कोइरालाको क्रेजी फ्यान भएको उनले बताइन् । स्कुलमा हुँदा मनिषा कोइरालाको पोष्टकार्ड आफूसँग एकदम धेरै हुने स्मरण गर्दै उनले आफूले बाल्यकालमा मनिषा कोइरालाको एकदम धेरै पोष्टकार्ड किन्ने गरेको उनले बताइन् । पत्रिकामा मनिषाको फोटो मुनी भएको ठेगानामा प्लाष्टिकको गुलावको फूल राखेर हुलाकबाट चिठी पठाउने गरेको समेत उनले स्मरण गरिन् ।

बलिउडमा अभियन गर्ने क्रममा कतिपयले आफूलाई मनिषासँग दाँज्ने गरेको र मनिषाको कोइरालाको बहिनी हो भनेर सोध्ने गरेको उनले बताइन् । छायांकनका क्रममा मनिषा कोइरालाको कोही आफन्त हौ भनेर सोध्ने गरेको उनले सम्झिइन् ।

हरेक क्षेत्रबाट पाठ सिक्न सकिने उल्लेख गर्दै उषा पौडेलले कलाकारिता क्षेत्रबाट पनि आफूले पाठ सिकेको बताइन् । कलाकारिता क्षेत्रले आफूलाई मान्छेमा अहमता हुनुहुदैन भन्ने सिकाएको र मान्छे सरल भएर हिड्नुपर्छ भन्ने सिकाएको उनले बताइन् । उनले भनिन् – ‘मैले मान्छेलाई मान्छेको व्यवहार गर्नुपर्छ भन्ने सिकें । त्यसैलाई फ्लो गर्छु ।’

आमा गुमाउदा ६ बर्षकी मात्र रहेकी उनले कुराकानीका क्रममा आफू आमाको मायाका लागि जीवनभर तड्पेको बताइन् । उनले आफ्नो सबैभन्दा ठूलो क्षति आमा गुमाउनुपरेको अवस्था भएको बताइन् । कुराकानीका क्रममा उनलाई जीवनको खराब निर्णयबारे सोधिएपनि आफूले त्यसबारे बोल्न नचाहने उनले बताइन् । तर उनले आफ्नो जीवनको सबैभन्दा ठूलो गोप्यता भने खुलासा गरिन् । अध्यारोमा सुत्न एकदम डर लाग्ने र बत्ति बालेर सुत्ने गरेको उनले बताइन् । पहिले पहिले एकदमै डर लाग्ने भएपनि अहिले बत्ति निभाएर सुत्ने प्रयास गर्ने तर सानो बत्ति भने बाल्ने गरेको उनले बताइन् ।

नेपाली चलचित्रमा महिला कालाकारमाथि हुने यौनहिंशाबारे पनि कुराकानीका क्रममा खुलासा गरिन् । आफू स्थापित भइसकेपछि नै एकजनाले फिल्ममा खेल्न अफर गरेको र आफूलाई यौनहिंशा गर्ने नियत राखेको उनले बताइन् । ती व्यक्तिले आफूलाई प्रमुख भूमिकामा खेल्ने अफर गर्दै भेट्न बोलाएपछि भेट्न गएको र फिल्ममा काम गर्ने सहमति भएको तर पछि पैसाको बारेमा कुरा गर्न बोलाएको बेला गलत नियत राखेपछि आफूले उक्त फिल्ममा काम नगरेको उनले बताइन् ।

आफूलाई भौतिक रुपमा आक्रमण नगरेको भएतापनि ती व्यक्तिको नियत स्पष्ट देखिएको र आफू अहिलेसम्म पनि ती व्यक्तिसँग नबोल्ने उनले बताइन् । आफूले दाई भनेर सम्बोधन गर्ने ती व्यक्तिका आफूजत्रै ठूला ठूला छोराछोरी भएको बताएपनि उनले नाम भने बताइनन् । ती व्यक्ति स्त्री जातीको इज्जत गर्न नजान्ने व्यक्ति भएको र पशु बराबर रहेको बताउँदै उनले ती व्यक्तिलाई ब्याँसोको संज्ञा दिइन् ।

कुराकानीका क्रममा उनले काठमाडौै र बम्बईमा भने काठमाडौं छानिन् । बम्बईलाई कर्मथलो पनि नेपाल जन्मथलो भएको र आफ्नोपन भएको उनले बताइन् । काठमाडौंमा पनि उनले आफूले बाल्यकाल विताएको ढोकाटोल मन पर्ने बताइन् । आफू नेपाल जाँदा हनुमान ढोकाको पछाडि रहेको सानो नेवार गाउँ ढोकाटोल पनि पुग्ने गरेको उनले बताइन् । उनले भनिन् – ‘मलाई ढोकाटोलप्रति आत्मीयता र सामिप्यता छ । नेपाल जाँदा ढोकाटोल जान्छु । त्यहाँ पुग्दा नोष्टाल्जिजक हुन्छु । बाल्यकालको खुबै याद आउँछ ।’

बिमलेश अधिकारीको युट्युब शो द बोल्ड टक वीथ बिमको अन्तिम भाग शुक्रबार रिलिज गरिएको छ । कार्यक्रम संचालक बिमलेश अधिकारी पनि नेपालका चर्चित कलाकार हुन् । उनले झण्डै साढे २ सय म्युजिक भिडियो र केही चलचित्रमा अभिनय गरिसकेका छन् ।