अमेरिकाको कनेक्टिकटमा जुलाई १५ मा नेपाल फेस्टिभल
प्रकाशित मिति : चैत्र ३, २०७९ शुक्रबार
अमेरिका र नेपालबीच कूटनीतिक सम्बन्ध स्थापना भएको ७५ औं वर्षगाँठको उपल़क्ष्यमा अमेरिकाको कनेक्टिकट राज्यको ब्र्यानफोर्ड शहरमा आगामी जुलाई १५ मा नेपाल फेस्टिभल २०२३ गरिने भएको छ । फेस्टिभल सोसाइटी अफ नेपालिज इन अमेरिकाले आयोजना गर्ने लागेको हो । सन् १९४७ अप्रिल २५ मा काठमाडौंमा नेपाल र अमेरिकाबीच कूटनीतिक सम्बन्ध स्थापना भएको थियो ।
नेपाली कला,संस्कृति, खानपान, भेषभूषा र मौलिकताको प्रवर्धन गर्ने उद्धेश्यले हुन लागेको यो उत्सवमा सिंगो नेपालको झझल्को दिने प्रयास गरिने आयोजकले बताएका छन् । ब्र्यानफोर्डमा उल्लेख्य संख्यामा नेपालीको बसोबास छ ।
नेपालीहरूको विभिन्न भेषभूषा एवं संस्कृति झल्काउने पहिरनका साथ झाँकी एवम् परेडबाट बिहान साढे ९ बजे कार्यक्रम सुरु गरिने जनाइएको छ । परेडमा कनेटिकट राज्यसहित वरपरका विभिन्न राज्य तथा शहरमा बसोबास गर्ने नेपाली संघ संस्था तथा स्थानीय समुदायहरूको समेत बाक्लो सहभागिता हुने आयोजकको अपेक्षा छ ।
महोत्सवमा कनेटिकट तथा वरपरका राज्यहरूका उच्च पदस्थ अधिकारीलाई पनि सहभागी गराउने प्रयास गरिने आयोजकले जानकारी दिएका छन् । कार्यक्रमा नेपालको कला तथा संस्कृति झल्काउने डिस्प्ले, नेपाली परिकारका खानाका स्टल, बालबालिकालाई रमाउने स्टलहरू राखिनेछ ।
महोत्सवमा स्थानीय कलाकारका साथै नेपाली कलाकारहरूले गीत, संगीत एवं विभिन्न सांस्कृतिक कार्यक्रम प्रस्तुत गर्नेछन् । नेपालीहरूको पहिचानलाई विश्व समुदायमाझ पुराउने अभियानका रूपमा नेपाल महोत्सव आयोजना गर्न लागिएको आयोजकले बताएका छन् ।