अमेरिका र दक्षिण कोरियालाई किम जोङको चेतावनी, पनडुब्बीबाट क्रूज मिसाइल प्रहार
प्रकाशित मिति : फाल्गुन २९, २०७९ सोमबार
दक्षिण कोरिया र अमेरिकाका सेनाले पछिल्लो पाँच वर्षयताकै सबैभन्दा ठूलो सैन्य अभ्यास सुरु गरेका छन् । यस सैन्य अभ्यासको विरोधमा उत्तर कोरियाले पनडुब्बीबाट दुईवटा रणनीतिक क्रुज मिसाइल प्रक्षेपण गरेको छ । किम जोङ उनले सैन्य अभ्यास सुरु हुनु केही घण्टा अघि यो मिसाइल प्रक्षेपण गरेका थिए । उत्तर कोरियाको सरकारी मिडियाले सोमबार क्षेप्यास्त्र प्रक्षेपणको पुष्टि गरेको छ। क्षेप्यास्त्र प्रक्षेपणले अमेरिका र दक्षिण कोरियालाई जवाफ दिने उत्तर कोरियाको दृढ संकल्प देखाएको आधिकारिक मिडियाले जनाएको छ।
उत्तर कोरियाले आइतबार गरेको क्षेप्यास्त्र परीक्षणले अमेरिका–दक्षिण कोरियाको ११ दिने सैन्य अभ्यासमा आफ्नो हतियार परीक्षण गतिविधिलाई निरन्तरता दिने संकेत गरेको छ । गत हप्ता, उत्तर कोरियाली नेता किम जोङ उनले आफ्ना सेनाहरूलाई आफ्ना प्रतिद्वन्द्वीहरूको “युद्धको तयारी र रणनीतिहरू” को सामना गर्न तयार रहन आदेश दिए। KCNA ले उत्तर कोरियाको लक्ष्य आणविक हतियारसहितको क्षेप्यास्त्र परीक्षण गर्ने भएको पनि बताएको छ ।
उत्तर कोरियाले सैन्य अभ्यासलाई आक्रमणको पूर्वाभ्यासको रूपमा वर्णन गरेको छ। यससँगै आफ्नो आत्मरक्षाका लागि आणविक हतियार आवश्यक भएको तर्क गरेको छ । अमेरिका र दक्षिण कोरियाका सेनाले सोमबार बिहानैदेखि स्वतन्त्रता ढाल अभ्यास सुरु गरेका छन् । २०१८ पछि पहिलो पटक दुवै देशले यति ठूलो अभ्यास गर्दैछन्। नवीनतम अभ्यासमा फ्रीडम शिल्ड २३ नामको कम्प्युटर सिमुलेशन र धेरै संयुक्त क्षेत्र प्रशिक्षण अभ्यासहरू समावेश छन्।
दक्षिण कोरियाले उत्तर कोरियाको लगातारको आणविक धम्कीका कारण कोरियाली प्रायद्वीपमा ठूलो संकट उत्पन्न भएको भन्दै यो अभ्यास गरिरहेको जनाएको छ । सन् २०२२ मा उत्तर कोरियाले धेरै मिसाइल परीक्षण गरेको थियो । “पनडुब्बीबाट प्रक्षेपण गरिएको क्रूज मिसाइललाई अमेरिका र उसका सहयोगीहरूले गम्भीरताका साथ लिनुपर्छ,” सियोलको इवा विश्वविद्यालयका प्राध्यापक लेफ-एरिक इस्लेले भने। उत्तर कोरियाले उक्त क्षेप्यास्त्र दुई घण्टा हावामा रहेको र देशको पश्चिमी तटतर्फ १५०० किलोमिटरसम्म पुगेको जनाएको छ । (एजेन्सी )