अमेरिकी पासपोर्ट हुनेहरु सन् २०२४ को मध्यसम्म ‘निशुल्क विनाभिसा’ युरोप आउन पाउने
प्रकाशित मिति : फाल्गुन २८, २०७९ आईतबार
अमेरिकी नागरिकहरूले अब सन् २०२४ को मध्यसम्म युरोपियन युनियन र शेंगेन देशमा प्रवेशका लागि अनलाइनबाट यात्रा अनुमति लिनु नपर्ने भएको छ । किनभने युरोपियन युनियनले यात्रा अनुमतिका लागि अनलाइनबाट आवेदन दिनुपर्ने प्रणाली लागु गर्नमा ढिलाई गरेको छ ।
युरोपियन ट्राभल इन्फर्मेसन एण्ड ऑथोराइजेसन सिस्टम अन्तरगत अमेरिकीहरूले भविष्यमा युरोपको अधिकांश भागमा यात्रा गर्न योग्य हुन अनलाइनबाट स्वीकृति प्राप्त गर्नुपर्नेछ । यो यात्राका लागि स्वीकृति लिनुपर्ने अमेरिकी इलेक्ट्रोनिक प्रणाली इस्टासँग मिल्दोजुल्दो छ।
अमेरिकीहरूले युरोपियन युनियन अन्तरगतको देशको यात्रा गर्दा आगामी नोभेम्बरबाट अनलाइन आवेदन दिन थाल्नुपर्ने थियो । तर अब यो कार्यक्रम आगामी नोभेम्बरबाट लागु नहुने भएको छ ।
यात्रा सुरक्षा प्रणालीको लागि ठेकेदारहरूले गरेको ढिलाइको कारणले गर्दा सुरुमा मे २०२३ मा लागु हुने तय भएको कार्यक्रम नोभेम्बरका लागि सारिएको थियो । तर आवागमन प्रणाली पूर्ण रूपमा सञ्चालन नगरी काम गर्न नसक्ने भएकोले नोभेम्बरमा पनि लागु नहुनेगरी स्थगित गर्नु बाहेक अर्को विकल्प नरहेको जनाइएको छ ।
यो प्रणाली कहिलेदेखि लागु हुने भन्नेबारे यकिन मिति अझै तय गरिएको छैन । आवागमन प्रणाली वर्षको अन्त्यमा लागू हुने र त्यसको पाँच वा छ महिना पछि युरोपियन ट्राभल इन्फर्मेसन एण्ड ऑथोराइजेसन सिस्टम लागु हुने अनुमान गरिएको छ ।
नयाँ प्रणाली पूर्ण रूपमा सञ्चालन हुने हालको अपेक्षित मिति २०२४ भएको गृह मामिला, आप्रवासन र आन्तरिक सुरक्षाका लागि युरोपियन युनियनको आयोगका प्रवक्ता अनिता हिपरको भनाई छ । नयाँ प्रणाली लागु भएपछि ६० भन्दा बढी देशका करिब १ दशमलव ४ बिलियन मानिसले भविष्यमा यात्राका लागि आवेदन दिनुपर्नेछ ।
यी देशहरुमा अमेरिका र अन्य देशहरू जस्तै युनाइटेड किंगडम, क्यानडा, न्यूजील्याण्ड, अल्बानिया, युक्रेन आदिका नागरिकहरू पनि छन्। आवेदन शुल्क ७ युरो लाग्नेछ, जुन विश्वको सबैभन्दा सस्तो यात्रा अनुमतिका लागि आवेदन हो ।