न्युयोर्कमा १० जनाको हत्या गर्ने पेटनबाट रुदै पश्चाताप, संघीय अदालतबाट मृत्युदण्डको सम्भावना
प्रकाशित मिति : फाल्गुन ३, २०७९ बुधबार
गत मे महिनामा न्युयोर्कको बफेलोको अश्वेत क्षेत्रमा रहेको एउटा किराना पसलमा जातीयवादी सामूहिक गोलीकाण्डमा १० जनाको हत्या गर्ने १९ वर्षीय श्वेत व्यक्तिले अदालतमा रुदै आफूले गरेको कामप्रति पश्चाताप भएको बताएका छन् । बुधबार अदालतको सुनुवाइपछि आजीवन जेल सजाय सुनाउने क्रममा उनले पश्चाताप भएको बताउँदै माफी मागे ।
‘पीडितहरू र तिनीहरूका परिवारहरूलाई भोग्न बाध्य पारेको सबै पीडाको लागि म धेरै दुखी छु। म तपाईंका प्रियजनहरूको जीवन चोरेकोमा धेरै माफी चाहन्छु। मैले मे १४ मा गरेका कार्यहरू र मेरा निर्णयहरूमा मलाई कत्तिको पश्चाताप छ, म व्यक्त गर्न सक्दिन,’ सुन्तला रंगको जम्पसूट र हतकडी लगाएका पेटन गेन्ड्रोनले अदालतमा भने।
उनले भने – ‘मैले त्यो दिन भयानक काम गरें। मैले मानिसहरूलाई अश्वेत भएकोले गोली हानेर मारे। अहिले फर्केर हेर्दा, म विश्वास गर्न सक्दिन कि मैले वास्तवमा यो गरें। मैले अनलाइन पढेको कुरामा विश्वास गरें र घृणाले काम गरें। मलाई थाहा छ म यसलाई फिर्ता लिन सक्दिन, तर म चाहन्छु कि म यसो गर्न सकौं । मैले गरेको कामबाट कोहीपनि प्रेरित नहोस्।’
प्यारोल बिनाको आजीवन कैद न्युयोर्कको सबैभन्दा ठूलो सजाय हो । किनभने सन् २००४ मा औपचारिक रुपमा खारेज गरिएपछि न्युयोर्कमा मृत्युदण्डको सजाय छैन ।
न्युयोर्कको अदालतले उनलाई आजिवन जेल सजायपनि उनलाई सघंीय अदालतले भने मृत्युदण्डको सजाय सुनाउने सम्भावना अझै छ । सुपरमार्केट भित्र र बाहिर अश्वेत मानिसहरूप्रति गेंडरोनभित्र विभेदको जरा गाडिएको अभियोजकहरूले तर्क दिएका छन् । प्रमाणहरूमा सामाजिक सञ्जाल पोष्टहरू र गेन्ड्रोनले लेखेको लामो कागजात समावेश छ । जसले आक्रमणको योजना बनाएको थियो र नरसंहार अघि धेरै पटक सुपरमार्केटको भ्रमण गरेको खुलासा गरेको थियो ।
गेन्ड्रोनले उक्त जिपकोडमा अश्वेत व्यक्तिहरुको उच्चतम निवास रहेकाले उक्त सुपरमार्केटलाई आफ्नो लक्ष्यको रूपमा रोजेको पोष्ट गरेको भेटिएको थियो । संघीय स्तरमा गेन्ड्रोनले घृणा अपराधको १० अभियोगको सामना गरिरहेकाले त्यसको सजाय मृत्युदण्ड समेत हुनसक्छ ।
गेन्ड्रोनले मृत्युदण्डको सजाय हुनसक्ने संघीय आरोपहरूमा दोषी अस्वीकार गरेको जनाइएको छ । तर उनका वकिलहरूका अनुसार अभियोजकहरूले उनलाई मृत्युदण्डबाट बचाउन सहमत भएमा बन्दुकधारीले संघीय आरोपहरूमा दोषी स्वीकार गर्न इच्छुक रहेको जनाइएको छ ।
न्याय विभागका अनुसार महान्यायाधिवक्ताले मृत्युदण्डको सजाय माग्ने कि नमाग्ने भन्ने बारे पछि निर्णय गर्नेछन्।