लस एन्जलसमा तामाङ संस्कृति झल्काउने कार्यक्रम र प्रतियोगिता
प्रकाशित मिति : माघ २६, २०७९ बिहीबार
तामाङ समुदायको नयाँ बर्ष ल्होसारको अवसरमा तामाङ सोसाइटी लस एन्जलसले स्थानीय आर्टेसिया पार्कमा तामाङ संस्कृति झल्काउने कार्यक्रम गरेको छ । कार्यक्रममा चर्चित दोहोरी गायक कृष्ण देवकोटाको समेत प्रस्तुती रहेको थियो ।
२८५९ औं सोनाम ल्होसार नयाँ बर्ष बिरालो बर्गको अवसरमा आयोजित कार्यक्रममा भलिवल प्रतियोगिता, म्युजिकल चेयर, लक्की ड्र लगायतको खेलकुद प्रतियोगिता आयोजना गरिएको थियो । एक आपसमा शुभकामना आदान प्रदानसहित सहभागीहरुले नेपाली खानाको स्वाद लिए ।
भलिवल प्रतियोगितामा अनिल केसी समूह प्रथम, रामचन्द्र लामिछानेको समुह दोस्रो, युवाहरुको समूह तेस्रो हुन सफल भयो ।
यसैगरी सामाजिक अभियन्ता सारदा श्रेष्ठको संयोजकत्वमा म्युजिकल चेयर प्रतियोगिता सम्पन्न भयो । पुरस्कृत खेलाडीहरुलाई नगद पुरस्कार प्रदान गरिएको थियो ।
कार्यक्रमलाई सम्बोधन गर्दै क्यालिफोर्नियका लागि नेपाली अवैतनिक वाणिज्यदूत ऋषि ढकालले प्रवासमा बस्ने नेपाली मुलका तामाङ समुदायले आफ्नो मौलिक संस्कृति जगेर्ना गर्ने र समुदायलाई जोड्ने कार्य गरेकोमा तामाङ सोसाइटी लस एन्जलसलाई धन्यवाद दिए ।
