न्युयोर्कबाट बेपत्ता ७५ बर्षकी नेपाली आमा मनमाया अस्पतालमा फेला
प्रकाशित मिति : माघ २५, २०७९ बुधबार
न्युयोर्कको क्वीन्सबाट सोमबारदेखि बेपत्ता ७५ बर्षकी नेपाली आमा मनमाया मगर आज न्युयोर्कको कोने आइल्याण्ड अस्पतालमा फेला पर्नुभएको छ । उहाँ बुधबार बेलुका अस्पतालमा फेला पर्नुभएको रायन लाम्गादेले जानकारी दिनुभयो ।
अस्पतालहरुमा खोजी गर्ने क्रममा अस्पालमा भेटिएको लाम्गादेले जानकारी दिनुभयो । न्युयोर्कका अस्पतालहरुमा अस्तीदेखि नै खोजी गरिएको थियो भने आजपनि अस्पतालहरुमा खोजी गर्ने क्रममा भेटिएको उहाँको खोजीमा सघाइरहनुभएका न्युयोर्कमा स्वास्थ्य क्षेत्रमा कार्यरत रायन लाम्गादेले जानकारी दिनुभयो ।
हिजो एल्महस्र्ट, फ्लसिङ, न्युयोर्क प्रेस्बिटेरियन र अष्टोरियाको माउन्ट साइनायी अस्पतालमा सम्पर्क गरेर खोजी गरिएको तथा एल्महस्र्ट अस्पतालमा आफै पुगेर खोजी गरेको लाम्गादेले जानकारी दिनुभयो ।
उहाँको खोजीका लागि प्रहरीले पनि पोष्टर जारी गरेको थियो । ती पोष्टरहरु क्वीन्सका विभिन्न स्थानमा टासिएको थियो । न्युयोर्कको नेपाली समुदायका सदस्यहरु उहाँको खोजीका लागि लागिरहेका थिए ।
उहाँ हराएको जानकारी प्रहरीमा सोमबार दर्ता भएको थियो ।
न्युयोर्कको क्वीन्स उडसाइड निवासी ७५ बर्षीय नेपाली मनमाया मगर बेपत्ता भएपछि परिवारले खोजीका लागि सघाउन अपिल गरेको थियो।उहाँ सोमबार विहान ७ बजेर ४० मिनेटमा सन्नीसाइडबाट हराउनुभएको थियो ।
४७ स्ट्रीटको ४८५६ उडसाइडमा बस्दै आएकी मनमाया विहान नातिनीलाई सन्नीसाइडमा रहेको एलिमेन्टरी स्कुल चिल्ड्रेन्स ल्याबमा पुराउन जानुभएको थियो ।
नातिनीलाई स्कुलमा छाड्न गएपछि उहाँ घर नफर्किएकाले परिवारले खोजी सुरू गरेको थियो । श्रीमानसँगै नातिनीलाई स्कुलमा छाड्न गएपनि ट्वाइलेट जानभन्दै पार्कमा गएको र श्रीमानले नातिनीलाई स्कुलमा छाडेर फर्कदा उहाँ हराउनुभएको थियो ।
४ महिना अगाडि अमेरिका आउनुभएकी उहाँ छोरा बुहारीसँगै बस्दै आउनुभएको छ। उक्त क्षेत्रमा खोज्दा फेला नपरेपछि विहान साढे ११ बजेतिर प्रहरीलाई खबर गरिएको थियो ।