टर्की र सिरियामा भूकम्पबाट ज्यान गुमाउनेहरुको संख्या २३ सय बढी, थप शक्तिशाली भूकम्प र पराकम्प
प्रकाशित मिति : माघ २३, २०७९ सोमबार
टर्की र सिरियामा सोमबार करिब एक शताब्दी यताकै शक्तिशाली भूकम्पपछि त्यसबाट मृत्यु हुनेहरुको संख्या २३ सय नाघेको छ । सोमबार टर्की र सिरियाका केही भागहरूमा मानिसहरू सुतिरहेका बेला आएको ७ दशमलव ८ म्याग्नीच्युडको भूकम्पले भवनहरू समतल बनाएको छ । जसमा हजारौं घाइते भएका छन् ।
स्थानीय समय अनुसार बिहान ४ बजेर १७ मिनेटमा सिरियाको सिमाना नजिक टर्कीको गाजिएन्टेपको उत्तरमा भूकम्प आएपछि धेरै मानिस ध्वस्त भवनमुनि फसेकाले मृत्यु हुनेको संख्या बढ्न सक्ने अधिकारीहरूले चेतावनी दिएका छन्। साइप्रस, लेबनान र इजिप्टमा पनि भूकम्पको धक्का महसुस गरिएको थियो।
सोही क्षेत्रमा सोमबार दिउँसो ७ दशमलव ५ म्याग्निच्युडको दोस्रो भूकम्प पनि गएको युएसजीएसले जनाएको छ । त्यसपछि कयौं शक्तिशाली पराकम्पन पनि महसुस गरिएको छ ।
टर्कीको प्रकोप तथा आपतकालीन व्यवस्थापन प्राधिकरणका अनुसार भूकम्पपछि टर्कीका १० प्रान्तमा १ हजार ४९८ जनाको मृत्यु भएको छ भने ८ हजार ५३३ जना घाइते भएका छन् । सिरियाली सरकारी सञ्चारमाध्यमले सरकारी नियन्त्रित क्षेत्रमा कम्तीमा ४३० जनाको ज्यान गएको र १ हजार ३१५ भन्दा बढी घाइते भएको बताएको थियो । त्यसका अतिरिक्त कम्तिमा ३८५ जना व्यक्तिहरूको विपक्षी नियन्त्रित क्षेत्रमा मृत्यु भएको छ भने १ हजारभन्दा बढी घाइते भएका छन् । जसले गर्दा सिरियामामात्र ज्यान गुमाउनेको संख्या ८१५ नाघेको छ ।
उत्तरपश्चिमी सिरियाको विपक्षी नियन्त्रित क्षेत्रहरूमा विनाशकारी भूकम्पको क्षतिका रिपोर्टहरू आएका छन् । जहाँ युद्धबाट विस्थापित लाखौं मानिसहरू सघन जनसंख्या भएका शहरहरूमा बस्छन्। गाजियन्टेप र यसको वरपरका क्षेत्रहरूमा लगभग १२ वर्षको युद्धबाट विस्थापित भएका हजारौं सिरियाली शरणार्थीहरू बस्दै आएका छन् ।
भूकम्पबाट व्यापक जनधनको क्षति भएपछि विश्वका नेताहरूले शोक व्यक्त गर्दै सहयोगका लागि अग्रसर भएका छन् । यसै बीच टर्कीले राहत र उद्धारकार्यमा सहयोग गर्न विश्वसमुदाय सँग आग्रह गरेको छ । टर्कीको प्रकोप र आपतकालीन व्यवस्थापन एजेन्सीले तत्काल राहत र सहायता परिचालन गर्न अन्तरराष्ट्रिय समुदायलाई आह्वान गरेको हो ।
टर्कीका राष्ट्रपति रेसेप तैयप एर्दोगानले ट्वीटमार्फत देशका धेरै भागहरूमा प्रभावहरू महसुस गरिएको र भूकम्पबाट प्रभावित क्षेत्रमा तुरुन्तै खोज र उद्धार टोलीहरू पठाइएको बताएका छन् ।
अमेरिकाका राष्ट्रिय सुरक्षा सल्लाहकार जेक सुलिभानले एक इमेल विज्ञप्तिमा विनाशकारी भूकम्पको रिपोर्टबाट अमेरिका अत्यन्तै चिन्तित भएको बताएको छ । अमेरिका आवश्यक कुनै पनि र सबै सहायता प्रदान गर्न तयार रहेको उनले बताएका छन् ।
अमेरिकी राष्ट्रपति बिडेनले युएसएआईडी र संघीय सरकारका अन्य साझेदारहरूलाई सबैभन्दा प्रभावितहरूलाई मद्दत गर्न अमेरिकी सहायता विकल्पहरूको मूल्याङ्कन गर्न निर्देशन दिएका छन् ।
वरिष्ठ अमेरिकी अधिकारीहरूले उनीहरूको टर्की समकक्षहरूसँग अमेरिकी सहायता समन्वय गर्न पुगेका र अमेरिका समर्थित मानवीय साझेदारहरूले सिरियामा पनि त्यस्तै गरिरहेका सोमबार एक विज्ञप्तिमा बाइडेनले बताएका छन् ।
बाइडेनले प्रियजनहरू गुमाएकाप्रति गहिरो समवेदना व्यक्त गर्नुका साथै घाइतेहरुको स्वास्थ्यलाभको कामना गरेका छन् ।