टर्की र सिरियामा भूकम्पमा परी मृत्यु हुनेको संख्या १२ सय नाघ्यो, अझै बढ्ने आकलन (तस्वीरहरु)
प्रकाशित मिति : माघ २३, २०७९ सोमबार
टर्की र सिरियाको सिमानामा गएको शक्तिशाली भूकम्पका कारण मृत्यु हुनेको संख्या १२ सय नाघेको छ । यसैबीच टर्कीमा केही समयअघि फेरि भूकम्पको धक्का महशुस भएको समाचार आइरहेका छन् । पछिल्ला परकम्पहरूको बारेमा थप जानकारी छैन। युएसजीएसका अनुसार दोस्रो भूकम्पको तीव्रता ७.५ मापन गरिएको छ ।
भूकम्पका कारण टर्कीमा मात्रै ९१२ जनाको ज्यान गएको र ५ हजार ३ सय ८३ जना घाइते भएको टर्कीका राष्ट्रपति रेसेप अर्देनले बताएका छन् । राहत र उद्धार कार्य जारी रहेको र मृतकको संख्या कति बढ्ने हो थाहा नभएको उनले बताए ।
बेलायतमा रहेको सिरियन अब्जर्भेटरी फर ह्युमन राइट्स इन सिरियाका अनुसार सिरियामा मृत्यु हुनेको संख्या ३२० पुगेको छ ।
टर्कीमा सोमबार बिहान दुईवटा शक्तिशाली भूकम्पको धक्का महसुस गरिएको छ । यसपछि टर्की सरकारले संकटकालको घोषणा गरेको छ । भूकम्प प्रभावित क्षेत्रका भवनहरूमा ठूलो क्षति पुगेको छ।
टर्कीमा उद्धार कार्य द्रुत गतिमा भइरहेको छ तर अधिकारीहरूले अझै धेरै मानिस भग्नावशेषमुनि पुरिएको हुन सक्ने आशंका गरेका छन् । अमेरिकी भूगर्भ सर्वेक्षण ‘युएसजीएस’का अनुसार पहिलो भूकम्प सिरियाली सीमा नजिकै गाजियनटेपको कहानमरास नजिक महसुस गरिएको थियो। युएसजीएसका अनुसार यस भूकम्पको म्याग्निच्युड ७ दशमलव ८ मापन गरिएको थियो ।
