टर्की र सिरियामा भूकम्पमा परी ५ सयभन्दा बढीको मृत्यु, तीन हजारभन्दा बढी घाइते
प्रकाशित मिति : माघ २३, २०७९ सोमबार
टर्कीमा सोमबार बिहान दुईवटा शक्तिशाली भूकम्पको धक्का महसुस गरिएको छ । यसपछि टर्की सरकारले संकटकालको घोषणा गरेको छ । भूकम्प प्रभावित क्षेत्रका भवनहरूमा ठूलो क्षति पुगेको बीबीले जनाएको छ ।
टर्कीमा उद्धार कार्य द्रुत गतिमा भइरहेको छ तर अधिकारीहरूले अझै धेरै मानिस भग्नावशेषमुनि पुरिएको हुन सक्ने आशंका गरेका छन् । अमेरिकी भूगर्भ सर्वेक्षण ‘युएसजीएस’का अनुसार पहिलो भूकम्प सिरियाली सीमा नजिकै गाजियनटेपको कहानमरास नजिक महसुस गरिएको थियो। यूएसजीएसका अनुसार यस भूकम्पको म्याग्निच्युड ७ दशमलव ८ मापन गरिएको छ ।
समाचार एजेन्सी एएफपीका अनुसार भूकम्पको पहिलो धक्का स्थानीय समयअनुसार बिहान ४.१७ बजे गएको थियो। त्यसको केही मिनेटपछि मध्य टर्कीमा दोस्रो भूकम्पको धक्का महसुस गरिएको थियो । टर्कीको राजधानी अंकारा र लेबनान, सिरिया, साइप्रस, प्यालेस्टाइनलगायत अन्य सहरमा पनि भूकम्पको धक्का महसुस गरिएको छ ।
टर्कीका गृहमन्त्री सुलेमान शोइलुले भूकम्पले देशका १० सहरमा ठूलो प्रभाव पारेको बताए । यी सहरहरू काहमानमार्श, हाते, गाजियन्टेप, ओस्मानी, अदियामान, सानलिउर्फा, मालत्या, अडाना, दियारबाकिर र किलिस हुन्। टर्की र यसको छिमेकी सिरियामा ५०० भन्दा बढीको मृत्यु भएको छ । मृत्यु हुनेको यो संख्या तीव्र गतिमा बढिरहेको अधिकारीहरुले बताएका छन् ।
टर्कीको मलात्या सहरका गभर्नरले भूकम्पका कारण अहिलेसम्म २३ जनाको मृत्यु भएको बताएका छन् । उनीहरूका अनुसार सहरमा ४२ जना घाइते भएका छन् भने करिब १४० भवनमा क्षति पुगेको छ । उस्मानी सहरका गभर्नरले पाँच जनाको मृत्यु भएको पुष्टि गरेका छन्। यससँगै सानलिउर्फामा १७ र दियारबाकिरमा ६ जनाको मृत्यु भएको समाचार छ ।
सिरियाको अलेप्पो, लताकिया, हामा र टार्टसमा भूकम्पका कारण ठूलो क्षति पुगेको समाचार छ । एलेप्पोमा ठूलो संख्यामा भवनहरू भत्किएको खबर पनि आएको छ । विद्रोहीको कब्जामा रहेका क्षेत्रमा कति क्षति भयो भन्ने अहिलेसम्म कुनै जानकारी आएको छैन ।