झण्डैले ठोक्किएनन् टेक्सासको एयरपोर्टमा उड्न र अवतरण गर्न लागेका २ विमान
प्रकाशित मिति : माघ २२, २०७९ आईतबार
साउथवेस्ट एयरलाइन्सको विमान उडिरहेको बेला फेडेक्सको विमान अवतरण गर्न लाग्दा टेक्सासको अष्टिन एयरपोर्टमा दुईवटा विमान ठोक्किनबाट थोरैलेमात्र बचेको घटनाबारे अनुसन्धान सुरु भएको छ । शनिबार विहानको यो घटनापपछि अमेरिकी उड्डयन अधिकारीहरूले घटनाको अनुसन्धान सुरु गरेका छन्।
अस्टिन बर्गस्ट्रोम अन्तर्राष्ट्रिय विमानस्थलमा हवाई ट्राफिक नियन्त्रकहरूले फेडेक्स कार्गो विमानलाई अवतरण गर्न क्लियर गरिएको रनवेमा साउथवेष्टको यात्रुवाहक विमानलाई उडान गर्न खाली गर्दा यो घटना भएको हो । गल्ती पहिचान भएपछि फेडेक्स विमानले आफ्नो अवतरण रद्द गरेर उचाई लिएको थियो ।
बोइङ ७६७ कार्गो विमान स्थानीय समय अनुसार बिहान ६ बजेर ४० मिनेटमा अवतरणका लागि तयारी गर्दा विमानस्थलबाट निकै नजिक थियो । तर यो अवतरण हुनु अघि एक एयर ट्राफिक नियन्त्रकले साउथवेस्ट एयरलाइन्सद्वारा संचालित विमानलाई उडान भर्न अनुमति दिएपछि झण्डै दुर्घटना भएन ।
फेडेक्स विमानका पाइलटले अवतरण नगरी उचाई लिन सुरु गरेपछि ठूलो दुर्घटना हुनबाट बचेको संघीय उड्डयन प्रशासनले एक विज्ञप्तिमा बताएको छ । साउथवेष्ट विमान कुनै घटना बिना उडान गर्न सक्षम भएको थिषे । फेडेक्सको विमान पनि घटना पछि सुरक्षित रूपमा अवतरण भएको थियो ।
शनिबारको घटना न्यूयोर्कको जोन अफ केनेडी एयरपोर्टमा दुईवटा विमान एकैपटक उड्न खोज्दा ठूलो दुर्घटना हुनबाट बचेको घटनापछि भएको हो । डेल्टा एयरलाइन्सको उडानले टेकअफ सुरु गर्ने क्रममा अमेरिकन एयरलाइन्सको उडानले रनवे पार गरेको देखेपछि अचानक ब्रेक लगाउनुपरेको थियो ।
जोन अफ केनेडी विमानस्थलमा दोस्रो घटना जनवरी १५ मा भयो जब जेटब्लु उडानले विमान पार्क गर्ने क्रममा अर्को विमानलाई असर गरेको थियो । जेटब्लु उडान पार्क गरिएको खाली विमानसँग थोरै ठोक्किएको थियो ।