आत्मदाह गरेका प्रेम आचार्यका नाममा गोफण्डमीमा दर्जन अभियान, २५ हजार डलरभन्दा बढी संकलन
प्रकाशित मिति : माघ १९, २०७९ बिहीबार
आत्मदाह गरेका प्रेम प्रसाद आचार्यको परिवारलाई सघाउन भन्दै गोफण्डमीमा झण्डै एकदर्जन अभियानहरु संचालन गरिएका छन्, जसमा अहिलेसम्म २४ हजार ६५८ अर्थात् ३३ लाख नेपाली रुपैयाभन्दा धेरै संकलन भएको छ । यस्ता अभियानहरु अमेरिका, क्यानडा, अष्ट्रेलिया लगायतका देशमा बस्ने नेपालीहरुले खोलेका हुन् ।
सबैभन्दा धेरै अमेरिका निवासी सुरेश दर्पण पोखरेलले सुरु गरेको अभियानमा १३, ७३२ डलर सकंलन भएको छ । त्यसपछि अष्ट्रेलिया निवासी दिपिका जमकट्टेलले सुरु गरेको अभियानमा ६ हजार ८ सय ९२ अष्ट्रेलियन डलर सकंलन भएको छ । क्यानडा निवासी बेनुप भट्टराईले सुरु गरेको अभियानमा १५७३ क्यानेडियन डलर संकलन भएको छ ।
त्यस्तै क्यानडा निवासी सविन धमलाले सुरु गरेको गोफण्डमीमा ८५५ क्यानेडियन डलर, नेस्को नर्वेले सुरु गरेको अभियानमा ११ सय क्रोना, अमेरिकाको ओहायो निवासी किशोर सिवाकोटीले सुरु गरेको अभियानमा ६३९ डलर, क्यालिफोर्नियाका प्रेमप्रसाद आचार्यले सुरु गरेको अभियानमा १३७९ डलर, न्युयोर्कका निसाप गुरुङले सुरु गरेको अभियानमा २५० डलर, अष्ट्रेलिया निवासी हिमानी पराजुलीले सुरु गरेको अभियानमा २३८ डलर संकलन भएको छ ।
बानेश्वरमा प्रतिनिधिसभाको बैठक चलिरहेकै बेला इलामका प्रेम आचार्यले संसद भवन नजिकै आफ्नो शरिरमा आगो लगाएका थिए । त्यसपछि उनको उपचारका क्रममा निधन भएको थियो ।