आत्मदाह गरेका प्रेम प्रसाद आचार्यको परिवारलाई सघाउन अमेरिकामा १ दिनमै १० हजार डलर संकलन
प्रकाशित मिति : माघ १२, २०७९ बिहीबार
आत्मदाह गरेका प्रेम प्रसाद आचार्यको परिवारलाई सघाउन अमेरिकामा १ दिनमै १० हजार डलर संकलन भएको छ । गोफण्डमीमा सुरेश दर्पण पोखरेलले सुरु गरेको अभियानमा यो समाचार तयार पार्दासम्म १० हजार ९८ डलर संकलन भएको छ ।
अहिलेसम्म ३३९ जनाले डोनेशन गरेका छन् भने सबैभन्दा धेरै २०१ डलरसम्म डोनेशन गरिएको छ ।
आचार्यको पत्रमा उल्लेख भए बमोजिम परिवारमाथी परिरहेको आर्थिक भारलाई केहि हदसम्म भएपनि न्यून गर्न र बाबाको असामयिक निधनबाट मर्माहत बन्न पुगेका २ छोरीहरूको शिक्षा दीक्षाकालागि व्यक्तिगत पहलमा‘ गोफण्डमी अभियान चलाएको पोखरेलले बताए ।
यो अभियानका सम्बन्धमा आफूले प्रेम प्रसाद आचार्यकी श्रीमती नानुका अधिकारी आचार्य र परिवारसँग समेत अनुमति लिएर कार्य अगाडि बढाएको उनको भनाई छ ।
१० हजार डलरको लक्ष्यसहित सुरुगरिएको यो अभियानमा लक्षित रकम १ दिनमै संकलन भएको हो । गो फन्डमीले लिने २ दशमलव ९ प्रतिशत सेवा रकम घटाएर प्राप्त हुने सम्पूर्ण रकम प्रेमप्रसाद आचार्यकी श्रीमति नानुका अधिकारी आचार्यलाई यथासिघ्र हस्तान्तरण गरिने टेक्सासमा बस्दै आएका पोखरेलले जानकारी दिए ।