१६ बर्षअघि यतिकै विमान चलाउँदा श्रीमानको निधनपछि अमेरिकामा पाइलट पढेकी अञ्जुको सपना अधुरै
प्रकाशित मिति : माघ १, २०७९ आईतबार
कास्कीको पोखरामा आइतबार दुर्घटनामा परेको यति एयरलाइन्सको विमानकी सहायक पाइलट विराटनगरकी अञ्जु खतिवडा १०० घण्टा उडान पूरा गरेपछि क्याप्टेन बन्नै लागेकी थिइन् । तर उनको यो सपना पूरा हुन पाएन ।
आज सफल अवतरणपछि अञ्जुले मुख्य पाइलटको लाइसेन्स लिन लागेकी थिइन् । तर, लक्ष्यबाट १० सेकेन्ड मात्रै टाढा हुँदा उनको सपना चकनाचुर भयो र धुवाँमा बिलायो ।
४५ वर्षीय अञ्जुले करिब सय घण्टा उडान भरिसकेकी थिइन् । आइतबार काठमाडौं–पोखराको उडान गरिसकेपछि उनको पाइलटमा बढुवा हुने अन्तिम परीक्षण उडान थियो । आज पाइलट कमल केसीले विमान उडाउँदा खतिवडा सहायक पाइलट थिइन् ।
१६ वर्षअघि जुन २१, २००६ मा भएको विमान दुर्घटनामा अन्जुले आफ्नो जीवनसाथी गुमाएकी थिइन्। उनका श्रीमान् पनि को पाइलट नै थिए । संयोगवश यती एयरलाइन्सकै लागि को पाइलट थिए । १६ वर्षअघि नेपालगञ्जबाट सुर्खेत हुँदै जुम्लाका लागि उडेको यति एयरलाइन्सको विमान दुर्घटना हुँदा ६ यात्रु र चालक दलका ३ सदस्यको मृत्यु भएको थियो । मारिएका मध्ये एक जना अन्जुका श्रीमान दीपक पोखरेल थिए ।
पोखरेलले सुरुमा नेपाली सेनाको हेलिकप्टर उडाउँथे । उनलाई यति एयरलाइन्सले जागिर दिने अफर गरेपनि उनले विमान चलाउन थालेका थिए । श्रीमानको पाइलट बन्ने सपना आफूले साकार पार्न अञ्जु अमेरिका गएर पाइलट पढेर फर्किएकी थिइन् ।
अञ्जु पाइलट कोर्स गर्न ६ वर्षकी छोरी मेलिसालाई नेपालमै छाडेर अमेरिका गएकी थिइन् । अहिले उनकी छोरी मेलिसा क्यानडामा अध्ययनरत छिन् ।