सिड्नीमा मोटरसाइकल दुर्घटनामा ज्यान गुमाउने व्यक्ति २१ बर्षीय नेपाली विद्यार्थी
प्रकाशित मिति : पुस १४, २०७९ बिहीबार
अष्ट्रेलियाको सिड्नीमा मोटरसाइकल दुर्घटनामा परेर २१ बर्षीय नेपाली विद्यार्थीको मृत्यु भएको छ । पश्चिम सिड्नीको हवरफिल्डमा मोटरसाइकल दुर्घटनामा उनको मृत्यु भएको प्रहरीले जनाएको छ ।
मङ्गलबार स्थानीय समय अनुशार बेलुका लगभग ८ बजेर १० मिनेटमा उक्त दुर्घटना भएको हो । बुमेराङ स्ट्रिट नजिकै सिटी वेस्ट लिंकको पश्चिम बाउन्ड लेनमा मोटरसाइकल मेटल स्पीड एडभाइजरी साइनसँग ठोक्किएको प्रहरीले जनाएको छ ।
मोटरसाइकलमा सवार २१ वर्षीय युवकको घटनास्थलमै मृत्यु भएको प्रहरीको भनाई छ । मोटरसाइकलमा उनी एक्लै चढेका थिए ।
प्रहरीले घटनाको परिस्थितिबारे थप अनुसन्धान गरिरहेको जनाइएको छ । घटनाको प्रतिवेदन तयार गरिने प्रहरीको भनाई छ ।