अमेरिकामा सरकारी उपकरणमा टिकटक प्रतिबन्ध लगाउने बिल दुबै सदनबाट पारित
प्रकाशित मिति : पुस ८, २०७९ शुक्रबार
अमेरिकामा सरकारी उपकरणमा टिकटक प्रतिबन्ध लगाउने प्रावधान दुबै सदनबाट पारित भएको छ । १ दशमलव ७ ट्रिलियनको संघीय खर्च विधेयकमा सरकारी उपकरणमा टिकटकको प्रतिबन्ध पनि समेटिएको छ ।
कानुनले संघीय सरकारका उपकरणहरूबाट चिनियाँ स्वामित्वको भिडियो एप टिकटकलाई प्रतिबन्ध लगाउनेछ । चीनको राष्ट्रिय सुरक्षा कानूनले टिकटक वा त्यसको मुल कम्पनी बाइटडान्सलाई अमेरिकी प्रयोगकर्ताहरूको व्यक्तिगत डाटा हस्तान्तरण गर्न बाध्य पार्नसक्नेबारे केही सांसदहरूले द्विपक्षीय चिन्ताहरू उठाएका थिए ।
हालै रिपब्लिकन गभर्नरहरूको नेतृत्वमा रहेका राज्यहरूले सरकारी स्वामित्वमा रहेका उपकरणहरूमा टिकटकको प्रयोगमा राज्य स्तरमा प्रतिबन्धहरू लगाएलगत्तै अब संघीय स्तरमा पनि प्रतिबन्ध लाग्ने भएको छ ।
सिनेटले बिललाई प्रतिनिधिसभामा पठाउन ६८ मतले पारित गरेको थियो । २९ जनाले बिलका विपक्षमा मतदान गरेका थिए । प्रतिनिधिसभामा पनि बिलका पक्षमा २२५ र विपक्षमा २०१ मत खसेको थियो ।
अमेरिकामा एक दर्जन भन्दा बढी राज्यहरूले सरकारले जारी गरेका यन्त्रहरूमा टिकटकलाई प्रतिबन्ध लगाएका छन् ।
यसैबीच टिकटकको चिनियाँ मूल कम्पनी बाइटडान्सले आन्तरिक अनुसन्धानमा चीनमा रहेका कर्मचारीहरूले दुई अमेरिकी रिपोर्टर सहित अमेरिकी टिकटक प्रयोगकर्ताहरूको डाटामा अनुपयुक्त रूपमा प्राप्त गरेको स्वीकार गरेको छ । बाइटडान्स टोलीका केही कर्मचारीहरूले पत्रकारहरूको आन्तरिक कुराकानी र व्यापार कागजातहरूको शंकास्पद लीकको स्रोतहरू फेला पार्ने प्रयास गरेका थिए ।
यसो गर्दा कर्मचारीहरूले आईपी ठेगानाहरू र दुई रिपोर्टरहरूको अन्य डाटा र उनीहरूको टिकटक खाताहरू मार्फत रिपोर्टरहरूसँग जोडिएका थोरै संख्यामा अन्य व्यक्तिका विवरणमा पहुँच प्राप्त गरेका थिए । तिनीहरूले ती व्यक्तिहरू बाइटडान्स कर्मचारीहरूको निकट भए नभएको निर्धारण गर्ने प्रयास गरेको कम्पनीले जनाएको छ । ती प्रयासहरू कुनै चुहावट फेला पार्न असफल भएको कम्पनीको भनाई छ ।
फोर्ब्समा एक लेख प्रकाशित भएपछि अनुसन्धान सुरु गरिएको थियो । र अनुसन्धानले त्यो रिपोर्टको अंश पुष्टि गरेको छ । साथै अमेरिकी सांसदहरू, राज्यका गभर्नरहरू, ट्रम्प र बिडेन प्रशासनले दुई वर्ष भन्दा बढी समयदेखि उठाएका टिकटकसँग सम्बन्धित गोपनीयता र सुरक्षा जोखिमहरूलाई समेत प्रकाश पारेको छ । कम्पनीले बाइटडान्स र चिनियाँ सरकारद्वारा अमेरिकी प्रयोगकर्ताका डाटामा कुनै पनि सम्भावित पहुँचलाई रोक्ने सुरक्षा र गोपनीयता उपायहरूमा प्रशासनसँग लामो समयसम्म वार्ता गरिरहेको बेला यो समाचार आएको हो ।
बाइटडान्सका सामान्य सल्लाहकार एरिक एन्डरसनले बिहीबार कर्मचारीहरूलाई इमेलमा बाहिरी कानुनी फर्मद्वारा गरिएको अनुसन्धानको निष्कर्षहरू खुलासा गरेका थिए । पत्रकार र अन्य अमेरिकी प्रयोगकर्ताको डाटामा पहुच कायम गर्ने योजनामा संलग्न सबै चार कर्मचारीलाई बर्खास्त गरिएको कम्पनीले जनाएको छ । तीमध्ये दुई जना चीनमा र दुई जना संयुक्त राज्यमा काम गरिरहेका थिए।
बाइटडान्सले आफ्नो आन्तरिक लेखा परीक्षण र जोखिम टोलीलाई पुनर्संरचना गरेको जनाएको छ । साथै त्यो विभागबाट अमेरिकी डाटामा कुनै पनि पहुँच हटाएको जनाएको छ ।
लक्षित रिपोर्टरहरूमा बजफिडका लागि लेखेकी र अहिले फोर्ब्समा कार्यरत एमिली बेकर ह्वाइट र फाइनान्सियल टाइम्सकी क्रिस्टिना क्रिडल रहेका छन् । बाइटडान्सले अन्य प्रभावित टिकटक प्रयोगकर्ताहरू पहिचान सार्वजनिक गर्न अस्वीकार गरेको छ ।
फोर्ब्सले रिपोर्ट गरे अनुशार अन्य थप दुई रिपोर्टरहरूलाई पनि लक्षित गरिएको थियो। उनीहरु बजफिडका पूर्व रिपोर्टरहरू पनि थिए । अनुसन्धानले ती थप रिपोर्टरहरू प्रभावित भएको निष्कर्षमा नपुगको बाइटडान्सले बताएको छ । आरोपहरू जाँच गर्न कच्चा डाटा पुन परीक्षण गर्ने बाइटडान्सले बताएको छ ।
एन्डरसन र बाइटडान्सका प्रमुख कार्यकारी रुबो लियाङले कर्मचारीहरूलाई छुट्टाछुट्टै इमेलहरूमा अनुसन्धानको निष्कर्षहरू खुलासा गरेका थिए । यस्तो अवस्थाको बारेमा सूचित गर्दा आफू गहिरो निराश भएको र अरु कर्मचारीले पनि त्यस्तै महसुस गर्ने लियांगले लेखेका थिए ।
आफूहरुले ठूला प्रयासहरू गरेर निर्माण गरेको जनताको विश्वास केही व्यक्तिहरूको दुर्व्यवहारले महत्त्वपूर्ण रूपमा कमजोर हुन गइरहेको उनले इमेलमा लेखेका थिए । टिकटकका प्रमुख कार्यकारीले पनि अनुसन्धानको बारेमा आफ्ना कर्मचारीहरूलाई एउटा इमेल पठाएका थिए, जसमा उनले निराशा व्यक्त गर्दै र अमेरिकी डाटा सुरक्षित गर्न कम्पनीको प्रतिबद्धतामा जोड दिएका थिए ।