Follow @khasokhasmag

अमेरिकामा नेपाली अमेरिकनले यसरी गरे मतदान (फोटो फिचर)


प्रकाशित मिति : कार्तिक २२, २०७९ मंगलबार

अमेरिकामा मंगलबार सम्पन्न चुनावले संसदमा कुन पार्टीको नियन्त्रण कायम रहने भन्ने कुराको निर्धारण गर्नेछ । अहिले प्रतिनिधिसभामा डेमोक्रेटिक पार्टीको बहुमत रहेको छ भने सिनेट पचास पचासमा विभाजित रहेको छ ।

मंगलबारको चुनावमा नेपाली अमेरिकनहरु पनि उत्साहजनक रुपमा नै सहभागी भए । कतिपयले अग्रिम मतदान गरेतापनि अधिंकाशले भने मुख्य दिनमा नै मतदान गरेका छन् ।

परिवारका साथमा नवराज केसी

न्युयोर्कको क्वीन्स कलेज प्वाइन्ट निवासी नवराज केसीले विहानै मतदान गरे । मताधिकारबारे बुझाउनका लागि उनले आफ्ना छोराहरुलाई पनि मतदान केन्द्रमा लगेका थिए । केसी न्युयोर्क सिटीका मेयरको एसियन अफेयर्स एडभाइजरी काउन्सिलका सदस्य हुन् भने न्युयोर्कका चर्चित रियल्टर समेत हुन् ।

श्रीमती प्रतिमा खतिवडासहित बासु फूलारा

त्यस्तै उडसाइड निवासी न्युयोर्कका कानून व्यवसायी बासु फूलाराले दिउसो कार्यालयमा जानुपर्ने भएकाले विहानै मतदान गरे । श्रीमती प्रतिमा खतिवडासहित मतदान केन्द्रमा पुगेका उनले मतदानका लागि पाँच मिनेट पनि नलागेको अनुभव सुनाए । प्रयाप्त मतदान केन्द्रहरु राखिएका कारण मतदाताहरुले धेरैबेर कुर्नु नपर्ने अवस्था रहेको थियो । भविश्यमा अमेरिकी राजनीतिमा सकृय हुने योजना बनाएका उनले अल्पसंख्यक भएतापनि नेपाली अमेरिकनहरुको अमेरिकाको मतदानमा सहभागिताको राजनीतिक अर्थ भएको बताए ।

डाक्टर विष्णुमाया परियार

त्यस्तै न्युजर्सी निवासी अधिकारकर्मी डाक्टर विष्णुमाया परियारले आफूले मतदान गर्नुका साथै अरुलाई पनि मतदान गर्नका लागि आव्हान गरिने । यदि आफ्नो मतदान केन्द्रमा जान नसकेका वा नाम नभेटिएमा एफिडाभिड मतपत्रमार्फत भएपनि मतदान गर्न उनले सुझाव दिइन् । तर मतदानको अधिकार प्रयोग गर्नैपर्ने उनको भनाई थियो ।

डाक्टर राजन थपलिया ।

न्युयोर्कको क्वीन्स निवासी लेखक तथा प्रोफेसर डाक्टर राजन थपलियाले उडसाइडको पीएस १२ मतदान केन्द्रमा गएर मतदान गरे । मतदान केन्द्रमा परिचयपत्र देखाएपछि कुनै झन्झटविना नै पाँचमिनेटमा आफूले मतदान गरेको उनले अनुभव सुनाए ।

कञ्चन बस्नेत

त्यस्तै न्युयोर्कको क्वीन्स निवासी कञ्चन बस्नेतले अमेरिकाको संसदीय चुनावमा पहिलोपटक मतदान गर्न पाउँदा निकै उत्साहित भएको बताइन् ।

पुरुषोत्तम ढकाल

क्यालिफोर्निया निवासी पुरुषोत्तम ढकालले डिजिटल मेसिनमार्फत मतदान गरेको अनुभव सुनाए । यसरी मतदान गर्दा निकै सहज र रोचक अनुभव भएको उनले बताए ।

न्युयोर्कको क्वीन्समा मतदान गरिसकेपछि एक नेपाली अमेरिकन मतदाता ।

अमेरिकामा मंगलबारको चुनावमा  मतदान गर्न योग्य नेपाली अमेरिकनहरुको संख्या ६० हजारको हाराहारीमा रहेको थियो । जसमध्ये न्युयोर्कमा झण्डै १० हजार नेपाली अमेरिकन मतदाताहरु रहेका छन् ।

न्युयोर्कको क्वीन्समा मतदान गरिसकेपछि एक नेपाली अमेरिकन मतदाता ।

अमेरिकाको चुनावका लागि मतदान गर्न योग्य हुने नेपाली अमेरिकनहरुको संख्या विगत ५ बर्षको अवधिमा नै झण्डै दोब्बर भएको छ । सुरुदेखि सन् २०१५ सम्मको तथ्यांक हेर्दा २५ हजार ३ सय ९९ जना नेपालीहरु योग्य रहेकोमा त्यसयता झण्डै ३५ हजार नेपालीले अमेरिकी नागरिकता लिएका छन् ।

चुनावमा अग्रिम मतदानपछि न्युयोर्कको क्वीन्स निवासी मनमोहन सिंह घिमिरे, निर्मला बास्कोटा र परिवार ।

कतिपय नेपालीहरुले अग्रिम मतदान समेत गरेका छन् । न्युयोर्कको क्वीन्स निवासी मनमोहनसिंह घिमिरेले श्रीमतीसहित अग्रिम मतदान गरे । उनले चुनावका दिन उपस्थीत हुन नसक्नेहरुले अग्रिम मतदान गर्नुपर्ने बताए ।

कभर तस्वीरमा मतदान गर्दै क्यालिफोर्निया निवासी रन्जना ढकाल पुडासैनी ।

   दर्ता नम्बर: २८२९

नमस्ते मिडिया

© 2022 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com