एनआरएनए महासचिव गौरी जोशीलाई मातृ शोक, एनआरएन नेताबाट श्रद्धाञ्जली र समवेदना
प्रकाशित मिति : आश्विन २७, २०७९ बिहीबार
व्यवसायी तथा गैर आवासीय नेपाली संघ एनआरएनएका महासचिव गौरीराज जोशीलाई मातृशोक परेको छ । उनकी आमा भुपा कुमारी जोशीको ७२ वर्षको उमेरमा विहिवार चितवनमा निधन भएको हो ।
स्वर्गीय जोशी केही समय देखि अस्वस्थ्य हुनुहुन्थ्यो । उहाँको चिवतन स्थित अस्पतालमा उपचारको क्रममा निधन भएको थियो। उहाँका चार छोरा र एक छोरी छन् । नेपाल र अमेरिकामा व्यवसाय गर्दै आएका गौरी जोशी माइला छोरा हुन् ।
आमाको स्वास्थ्य र हेरविचारका लागि केही दिन देखि गौरी जोशी नेपालमै थिए । शुक्रवार विहान देवघाटमा दाहसंस्कार गरिने कार्यक्रम छ।
जोशी परिवारमा परेको यो शोक प्रति एनआरएनए पदाधिकारी लगायतले गहिरो दुख व्यक्त गरेका छन् । गैरआवासीय नेपाली संघका अध्यक्ष कुल आचार्यले गैरआवासीय नेपाली संघका महासचिव गौरीराज जोशीकी आमाको निधनप्रति दुःख व्यक्त गरेका छन् ।
एनआरएनए पूर्व अध्यक्ष जिवा लामिछानेले गौरी जोशीकी ममतामयी आमाको निधनको खबरले आफू दुखी भएको बताएका छन् ।
हप्ता दिन अघि अस्पतालमा भेट्दा आमाको स्वास्थ्य सुधारोन्मुख देखिएको स्मरण गर्दै लामिछानेले स्वर्गीय आमाप्रति श्रद्धाञ्जली व्यक्त गर्नुका साथै गौरी जोशी लगायत शोकसन्तप्त परिवारजनमा समवेदना व्यक्त गरेका छन् ।