आनुवंशिक रूपमा परिमार्जित नयाँ खालको बैजनी टमाटर अमेरिकी बजारमा आउँदै
प्रकाशित मिति : आश्विन २, २०७९ आईतबार
अमेरिकाको डिपार्टमेन्ट अफ एग्रिकल्चरले आनुवंशिक रूपमा परिमार्जित बैजनी रंगको टमाटरलाई बजारमा लैजान स्वीकृति दिएको छ । रातो टमाटरको भन्दा धेरै स्वास्थ्य लाभहरू भएको र धेरै समय नबिग्रने दावी गरिएको यो टमाटर केही समयपछि ग्रोसरी स्टोरहरुमा देखिने भएको छ ।
टमाटर जस्तै स्वाद, टमाटर जस्तै गन्ध, र टमाटर जस्तै आकार भएपनि यसको रंग भने बैजनी रहेको छ । आनुवंशिक रूपमा परिमार्जित बैजनी टमाटरको अनुमोदन पछि यो अर्को वर्ष अमेरिकी पसलहरूमा बेच्नको लागि राखिने अपेक्षा गरिएको छ ।
यो टमाटर ब्रिटिश बायोकेमिस्ट क्याथी मार्टिन सहित वैज्ञानिकहरूको टोलीद्वारा विकसित गरिएको हो । मुसामा गरिएको परीक्षणमा बैजनी टमाटर खाने क्यान्सर भएको मुसा सामान्य टमाटर खाने भन्दा ३० प्रतिशत लामो बाँच्ने अध्ययनले देखाएको थियो ।
केही समयदेखि आनुवंशिक रूपले परिमार्जित खाद्यान्नहरूमा ध्यान केन्द्रित गरिएपनि उपभोक्ताहरूका लागि आनुवंशिक रूपमा परिमार्जित खाना खाने फाइदाहरू अस्पष्ट छन्। यद्यपी बैजनी टमाटर खाने नखाने छनौट उपभोक्ता आफैले गर्न सक्नेछन् ।
बैजनी टमाटरको लागि अर्को चरण एफडीएबाट स्वीकृति र व्यावसायीकरण हो । एफडीएले स्वीकृति दिएपछि त्यसलाई उत्पादन गर्न र वितरण गर्न उत्पादकहरूसँग काम गरिनेछ ।