१ लाख भन्दा कम आम्दानी भएका परिवारका विद्यार्थीलाई न्युजर्सीको प्रिन्सटन युनिभर्सिटी निशुल्क
प्रकाशित मिति : भाद्र २६, २०७९ आईतबार
शीर्ष अमेरिकी विश्वविद्यालयहरू मध्ये एक न्युजर्सीको प्रिन्सटन युनिभर्सिटीमा अध्ययन गर्ने विद्यार्थीहरूका लागि नयाँ अफर ल्याइएको छ । बार्षिक १ लाख डलरभन्दा कम आम्दानी हुने परिवारका विद्यार्थीहरुले प्रिन्सटन युनिभर्सिटीमा निशुल्क अध्ययन गर्न पाउने भएका छन् ।
न्यु जर्सीको प्रिन्सटन युनिभर्सिटीले कम आम्दानी भएक परिवारहरूले अव यो प्रतिष्ठित विद्यालयमा जानको लागि कुनै शुल्क तिर्नु नपर्ने घोषणा गरेको छ । यो युनिभर्सिटीमा पूर्व प्रथम महिला मिशेल ओबामा, अमेरिकी सर्वोच्च अदालतका न्यायाधीश सोनिया सोटोमायर, जोर्डनकी महारानी नूर र जेफ बेजोस लगायतले अध्ययन गरेका थिए ।
यस अगाडि बार्षिक ६५ हजारभन्दा कम कमाउने परिवारका विद्यार्थीलेमात्र पूर्ण आर्थिक सहायता कभरेज प्राप्त गर्थे। अब युनिभर्सिटीका २५ प्रतिशतभन्दा भन्दा बढी स्नातक वा १५ सय विद्यार्थीहरूले निशुल्क पढ्न पाउनेछन् । जसले ट्युशन, कोठा र बोर्डको पूर्ण लागत कभर गरिनेछ ।
आइभी लिग विश्वविद्यालयमा एक वर्षको ट्युसनको लागत लगभग ८० हजार डलर रहेको छ । विश्वविद्यालयको आर्थिक सहायता विस्तारले १ लाख ५० हजार सम्म कमाउने परिवारहरूलाई पनि मद्दत गर्नेछ ।
सबै पृष्ठभूमिका प्रतिभाशाली विद्यार्थीहरूले प्रिन्सटन शिक्षा मात्र नभई आफूहरुको क्याम्पस र त्यसभन्दा बाहिरको संसारमा फस्टाउन सक्ने सुनिश्चित गर्ने आफूहरुको प्रतिबद्धता रहेको प्रिन्सटनका अध्यक्ष क्रिस्टोफर एल आइसग्रुबरले बताएका छन् । पूर्व छात्र र साथीहरूको निरन्तर उदारताले यो सम्भव भएको उनले बताएका छन् ।
२०२३ को फलमा प्रिन्स्टनमा अध्ययन सुरु हुने विद्यार्थी नयाँ र सुधारिएको वित्तीय सहायता योजनाबाट लाभान्वित हुने पहिलो समुह हुनेछन् । विश्वविद्यालयले वार्षिक विद्यार्थी शुल्क पनि हटाएको छ । साथै व्यक्तिगत खर्च र पुस्तकहरूको लागि वित्तीय सहायता भत्ता बढाइएको छ ।