ओबामाको आधिकारिक पोट्रेट अन्ततः ह्वाइट हाउसमा अनावरण
प्रकाशित मिति : भाद्र २२, २०७९ बुधबार
अमेरिकामा पूर्व राष्ट्रपतिहरू र प्रथम महिलाहरूको आधिकारिक व्हाइट हाउस तस्विर नयाँ राष्ट्रपतिले अनावरण गर्दै आएको परम्परा रहेको छ । तर डोनाल्ड जे ट्रम्प सत्तामा हुँदा बराक ओबामा र मिशेल ओबामाको तस्विर अनावरण समारोह आयोजना गरिएन ।
ओबामाको आधिकारिक तस्विर अन्ततः बुधवार ह्वाइट हाउसको पूर्वी कोठामा ट्रम्पपछिका राष्ट्रपति बाइडेनद्वारा अनावरण गरिएको छ । उक्त समारोहमा बोल्दै ओबामाले अत्यन्तै खुशी लागेको र आफ्नो प्रशासनका धेरै सदस्यहरूसँग पुनर्मिलन जस्तो महसुस भएको बताएका छन् ।
व्हाइट हाउस हिस्टोरिकल एसोसिएसनको पहलमा बनाइएका तस्वीरहरु र कलाकारहरूको पहिचान गोप्य राखिएको थियो । पूर्व राष्ट्रपति बराक ओबामाको तस्विर रोबर्ट म्याककर्डीले र पूर्व प्रथम महिला मिशेल ओबामाको तस्वीर शेरोन स्प्रंगले बनाएको जनाइएको छ ।
ओबामाले कलाकारहरूको प्रशंसा गरेका छन् । मिशेलको बारेमा मनपर्ने सबै कुराहरू तस्वीरमा राखेकोमा शेरोन स्प्रङलाई धन्यवाद दिए भने आफ्नो तस्वीर बनाउने धेरै गाह्रो विषय रोजेकोमा रोबर्ट म्याककर्डीलाई धन्यवाद दिए ।
इस्ट रुममा तस्वीरको औपचारिक अनावरणका लागि राष्ट्रपति बाइडेन उनकी पत्नी जिलसँग सामेल भएका थिए । जहाँ उनीहरूले ओबामाप्रतिको आफ्नो स्नेह देखाए । घरमा स्वागत छ भन्दै ओबामाका उपराष्ट्रपति भइसकेका बाइडेनले ओबामा परिवारलाई न्यानो अभिवादन गरेका थिए ।
पूर्व राष्ट्रपतिका तस्वीरहरु सामान्यतया नयाँ राष्ट्रपतिको पहिलो कार्यकालमा अनावरण गरिन्छ। ओबामाको मामलामा ट्रम्पले गर्नुपर्ने थियो । तर ट्रम्पले समारोहको आयोजना नै गरेनन् । ओबामा राष्ट्रपति हुँदा फरक राजनीतिक विचारधाराको बाबजुद सन् २०१२ मा उनले पूर्व राष्ट्रपति जर्ज डब्लु बुशको तस्वीर अनावरण समारोह आयोजना गरेका थिए ।
बाइडेनले ट्रम्पको लागि कार्यक्रम कहिले आयोजना गर्ने भन्ने स्पष्ट छैन । यसबारेको प्रश्नमा ह्वाइटहाउसले ती प्रश्नहरू व्हाइट हाउस हिस्टोरिकल एसोसिएसनतिर सोझिने बताएको छ । व्हाइट हाउस हिस्टोरिकल एसोसिएसनले पूर्वराष्ट्रपति र उनीहरूका जीवनसाथीको लागि आधिकारिक चित्रहरूमा प्रक्रियाको नेतृत्व गर्ने भएकाले त्यसको जवाफ उनीहरुसँग भएको बताइएको थियो ।
बाइडेन र ट्रम्प बीचको राजनीतिक दुश्मनी गहिरो र सार्वजनिक रहेको छ । दुई व्यक्तिहरू अझै पनि २०२४ को चुनावमा एकअर्काको बिरूद्ध सामना गर्न सक्नेछन् । यो अवस्थामा उनीहरुले एकसाथ रमाइलो समारोह गर्ने सम्भावना कम देखिएको छ ।