Follow @khasokhasmag

अमेरिकाभर रहेका मगरहरुको भेला शनिबार टेक्सासको डलासमा, आपतकालिन कोष बनाइने


प्रकाशित मिति : श्रावण १८, २०७९ बुधबार

मगर संघ अमेरिकाको आठौं बार्षिक साधारणसभा अगस्त ६  शनिबार टेक्सासको डलासमा हुने भएको छ । मगरहरुको बाहुल्य रहेका अमेरिकाका विभिन्न १२ राज्यका मगरहरुको जमघट टेक्सास राज्यमा हुने र सभाको सम्पुर्ण तयारी पूरा भएको मगर संघ अमेरिका केन्द्रिय समितिका अध्यक्ष कुलदिप राना मगरले जानकारी दिए ।

मगर संघ अमेरिका केन्द्रीय समितिको आयोजना र मगर संघ अमेरिका टेक्सास च्याप्टरको संयोजनमा कार्यक्रम हुन लागेको हो । प्राय न्युयोर्क, न्युजर्सी र मेरिल्याण्ड आसपासमा मगर संघ अमेरिकाले अधिवेशन र साधारणसभा गर्दै आएपनि पहिलो पटक टेक्सासमा गर्न लागेको हो ।

मगर संघ अमेरिका भर फैलिएको र अमेरिका भर छारिएर रहेका मगरहरुको एकताको सन्देश दिन टेक्सासमा कार्यक्रम गर्न लागिएको आयोजकले जानकारी दिए । ‘अमेरिकाको मुलप्रबाहमा मगरहरुको उपस्थिति र सहभागिता, उदाउँदो मगर पुस्ता माझ मगर भाषा, संस्कार र संस्कृति हस्तान्तरण आजको आवश्यकता’ भन्ने मुल नाराका साथ मगर साधारणसभा हुन लागेको हो ।

विगत एकदशक देखि मगर समुदाय माझ चर्चाको बिषय बनेको मगर आपतकालिन कोषलाई मुर्तरुप दिएर साधारणसभामा सुरुवात गरिने भएको छ । विभिन्न आपत विपतको समयमा मगर समुदायलाई सहयोग गर्न यो कोष स्थापना गरिने भएको छ । यसैगरी मगर विद्यार्थीहरुलाई हौसला र प्रोत्साहन , संस्था प्रति बिद्यार्थीको आकर्षण बढाउन पहिलो पटक तीन तहका उत्कृष्ट मगर बिद्यार्थीहरुलाई छात्रबृत्ति प्रदान गर्न लागिएको र हरेक बर्ष निरन्तरता रहने जनाइएको छ ।

नेपाल आदिवासी जनजाती अन्तर्राष्ट्रिय महासंघका अध्यक्ष मन बहादुर राना मगरको प्रमुख आतिथ्य र युलेसका काउन्सिल सदस्य टीका पौडेलको विशेष आतिथ्यमा कार्यक्रमको उद्घाटन हुनेछ । उद्घाटन समारोह , बन्द सत्र र सांस्कृतिक कार्यक्रम गरी तीन चरणमा कार्यक्रम हुनेछ ।

   न्युयोर्क स्टेट, डिपार्टमेन्ट अफ स्टेट, डिभिजन अफ कर्पोरेशन, दर्ता नम्बर: ५२५५२५८

नमस्ते मिडिया इन्क.

न्युयोर्क, अमेरिका

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com